Kurti shpreh optimizëm për Gjykatën Speciale: Kemi vullnet dhe mundësi për konsensus, s’ka vend për gabime të reja

Kryeministri i Kosovës, Albin Kurti, ka bërë të ditur se projektligji i iniciuar nga Partia Demokratike e Kosovës (PDK) për ndryshimin e Ligjit për Dhomat e Specializuara tashmë ka kaluar në fazën e vlerësimit juridik pranë Ministrisë së Drejtësisë, si dhe po i nënshtrohet një analize buxhetore në Ministrinë e Financave. Kurti u shpreh i bindur se ekzistojnë hapësirat dhe vullneti i nevojshëm për të arritur një dakordim ndërpartiak. Ai vuri theksin te fakti se debatet rreth kësaj teme të ndjeshme nuk duhet të zhvillohen përmes ekraneve televizive apo mediave, por në tavolinat e bisedimeve ndërmjet krerëve të subjekteve politike dhe grupeve parlamentare. “Unë besoj që duhet të ketë takime, diskutime dhe pajtime. Unë e kam parë që është e mundur. Ekziston rruga në të cilën mund të ecim bashkë. Dhe 99 votat e sotme në deklaratën e sotme janë gjithashtu një dëshmi e qartë për këtë. Unë nuk besoj që këto diskutime duhet t’i bëjmë në media. Besoj që këto diskutime duhet të zhvillohen mes krerëve të partive, mes subjekteve parlamentare, në bisedat e brendshme dhe më pastaj t’i publikojmë rezultatet e këtyre bisedave. Unë jam optimist sepse e kam parë që është e mundur. Pra, përveç se kemi vullnet, kemi mundësi. E kur ekziston edhe vullneti edhe mundësia, është më pak se një muaj nga suksesi”, deklaroi kreu i ekzekutivit. Duke trajtuar punën dhe vendimet e Dhomave të Specializuara, shefi i Qeverisë theksoi se qëndrimi i tij kritikisht i palëkundur ndaj këtij institucioni mbetet i pandryshuar, duke shtuar se prej tij nuk ka pritur kurrë drejtësi të mirëfilltë. Me këtë rast, ai renditi tri pika kyçe që i cilësoi si “defekte kapitale” të kësaj gjykate: konceptin e ndërmarrjes së përbashkët kriminale, mungesën e transparencës shoqëruar me qasjen monoetnike, si dhe gabimet faktike e historike. “Tash ju e keni parasysh që tek ky gjykim i Dhomave të Specializuara, nga i cili unë nuk mund të thosha se kam pritur drejtësi, për shkak se asnjëherë se kam ndryshuar qëndrimin tim për këtë gjykatë, janë tri defekte kapitale. I pari është cilësimi i ndërmarrjes së përbashkët kriminale. Nuk ka pasur ndërmarrje të përbashkët kriminale. Dhe kjo duhet, patjetër të korrigjohet në Apel. E dyta është që ka munguar transparenca dhe ka pasur në njëfarë mënyre absolutisht veçse gjykatë monoetnike. Ju e dini që Zëvendësministri i Punëve të Brendshme, Enver Dugolli, ishte, siç e keni marrë vesh më herët në Kuvend, si i mbijetuar i masakrës së Dubravës, ka bërë një kallëzim penal në Dhomat e Specializuara në mënyrë që ta trajtojnë edhe çështjen e masakrës së Dubravës, ku janë mbledhur të burgosurit shqiptarë në pranverën e vitit 1999 nga mbarë Serbia dhe janë sjellë në Dubravë të Istogut, ku më pastaj mbi 100 prej tyre janë pushkatuar e janë ekzekutuar nga gardianët e Serbisë”, u shpreh Kurti. Kryeministri shtoi se tragjedia e Dubravës hyn qartësisht brenda mandatit dhe fushëveprimit kohor të Gjykatës Speciale, mirëherë kritikoi faktin se kallëzimi penal i dorëzuar ka mbetur pa asnjë përgjigje institucionale. “Prapë, kjo është gjatë luftës së fundit në Kosovë. Është përbrenda fushëveprimit, është përbrenda mandatit, është përbrenda kohës së Dhomave të Specializuara dhe trajtimeve që ato bëjnë. Dhe që nga prilli i vitit 2023, pra tri vjet e gjysmë, nuk ka marrë asnjë përgjigje nga Dhomat e Specializuara. Kjo është, karakteri monoetnik bashkë me mungesën e transparencës, janë dy defektet e tjera”, tha ai. Në fund, si defekt të tretë, Kurti veçoi pasaktësitë e rënda faktike dhe historike që përmban lënda, duke rikujtuar se vendimmarrja e plotë e kësaj gjykate shtrihet në mijëra faqe dokumentesh. “Dhe i treti, natyrisht janë ato pasaktësitë faktike dhe historike të cilat i dëgjuam me datën 16 shtator, por nuk duhet të harrojmë se atë ditë janë...