Nga goditja e plantacioneve të kanabisit te rrjetet e fajdeve: Prokurori Ersan Qavolli avancon në Zyrën e Kryeprokurorit

Pas një angazhimi disavjeçar në trajtimin e krimeve të rënda dhe dosjeve më të ndjeshme në Prokurorinë Themelore në Pejë, prokurori Ersan Qavolli ka bërë një hap të rëndësishëm në karrierën e tij, duke u avancuar në Zyrën e Kryeprokurorit të Shtetit. Kolegët e institucionit ku ka shërbyer deri më tani e kanë përcjellë me mirënjohje të lartë, duke vlerësuar kontributin e tij të çmuar profesional ndër vite. Ersan Qavolli e kishte nisur rrugëtimin e tij si prokuror në Pejë më 22 janar 2018, ndërkohë që vitet e fundit ka mbajtur edhe detyrën e zëvendëskryeprokurorit të kësaj prokurorie. Përveç punës intensive në Departamentin për Krime të Rënda, ai ka dhënë kontribut edhe në fushën akademike si trajner në Akademinë e Drejtësisë, duke u përqendruar te veprat penale që lidhen me narkotikët dhe substancat e ndaluara. Emri i Qavollit mori një jehonë të madhe publike përmes operacioneve të suksesshme kundër drogës në rajonin e Pejës. Gjatë aksionit “Vera 2024”, të zhvilluar në shtator të vitit të kaluar nga Prokuroria Themelore në Pejë në bashkëpunim me Policinë e Kosovës, u shkatërruan dy plantacione të mëdha me 2,850 bimë marihuane, ndërsa u sekuestruan rreth 500 kilogramë lëndë narkotike që ishin në proces tharjeje. Sipas të dhënave zyrtare të bëra publike nga vetë ai, pas përpunimit të plotë sasia e sekuestruar e narkotikëve arriti në 1,035 kilogramë. Llogaritur së bashku me bimët e asgjësuara, sasia totale e kapur kalonte shifrën e dy tonëve, me një vlerë tregu që llogaritej mbi pesë milionë euro, ndërkohë që në këtë rast u identifikuan disa të dyshuar, përfshirë edhe shtetas nga Shqipëria. Megjithatë, goditja e këtyre rrjeteve kriminale nuk kaloi pa sfida dhe rreziqe. Për shkak të natyrës së ndjeshme të rasteve që hetonte në Departamentin për Krime të Rënda, prokurori Qavolli dhe anëtarët e familjes së tij u ballafaquan me kërcënime direkte, një ngjarje kjo që u raportua gjerësisht në opinionin publik gjatë periudhës kur hetimet ishin në fazën më intensive. Përveç luftës ndaj narkotikëve, Qavolli është shquar edhe për goditjen e grupeve kriminale që merreshin me fajde. Një nga rastet më domethënëse daton në vitin 2021, kur pas denoncimit të një qytetari nga Peja se ishte zhytur në borxhe të rënda, çështja i u besua atij. Përmes kërkesës së Prokurorisë për masa të fshehta hetimi, të cilat përfshinin blerjen e simuluar, fotografimin e fshehtë dhe përgjimin e komunikimeve, u dokumentua skema se si funksiononte ky rrjet fajdexhinjsh, duke çuar në arrestime dhe në nisjen e procedurave penale. Një tjetër operacion i bujshëm u zhvillua në qershor të vitit 2024, ku me urdhër të prokurorit Ersan Qavolli, Policia e Kosovës arrestoi katër persona të dyshuar për veprat penale të fajdesë, detyrimit dhe rrëmbimit. Gjatë këtij aksioni u zbulua se dyshohej për një shumë prej 120 mijë eurosh të dhëna me fajde, për të cilat kërkohej kthimi i dyfishit, respektivisht 240 mijë eurove.