Skandali financiar i Manchester Cityt: Wayne Rooney del kundër idesë së trashëgimit të titujve

Wayne Rooney ka dhënë qëndrimin e tij lidhur me diskutimet e ashpra rreth mundësisë së heqjes së titujve të Premier League për Manchester Cityn, në rast se klubi shpallet fajtor për shkeljen e rregullave financiare. Autoritetet pritet të marrin një vendim përfundimtar ndaj klubit nga Manchesteri, sanksionet e të cilit mund të përfshijnë deri në privimin e tetë trofeve të kampionatit të fituar prej vitit 2008 e tutje. Megjithatë, drejtuesit e klubit anglez janë përgatitur të apelojnë çdo masë ndëshkuese që mund të vendoset ndaj tyre. Përballë kësaj situate të tensionuar, ish-lojtarët e Manchester United, Rio Ferdinand dhe David de Gea, kanë sugjeruar më parë se trofetë e hequr duhet t'i kalojnë skuadrës që është renditur në vendin e dytë. Pavarësisht kësaj, ish-kapiteni legjendar i United, Wayne Rooney, shprehet plotësisht kundër këtij propozimi. Sipas 40-vjeçarit, ai nuk do të ndjehej aspak mirë sikur klubi i tij të trashëgonte tituj kampionati vite me vonesë, pa i fituar ato fillimisht në fushën e blertë përmes djersës dhe garës sportive. “Të jem i sinqertë, nuk do të ndihesha rehat ta pranoja, sepse nuk mendoj se e kemi merituar”, deklaroi Rooney gjatë një paraqitjeje në podcastin “Stick to United”. Gjatë analizës së tij, ai kërkoi që situata të shihet edhe nga këndvështrimi i vetë futbollistëve të Manchester Cityt, të cilët kanë luftuar në fushë dhe kanë qenë të bindur se i kanë fituar me meritë ato trofe. “E vendos veten në pozicionin e lojtarëve të tyre. Ata kanë bërë gjithçka për të fituar titullin e Premier League dhe, në mendjen e tyre, ia kanë dalë. Nëse do të më ndodhte mua, nëse papritur do të zbulohej se Manchester United kishte bërë të njëjtën gjë dhe të më hiqnin titullin e Premier League, do të isha absolutisht i shkatërruar”, shtoi më tej ish-sulmuesi i njohur anglez. Wayne Rooney, i cili sot është 40 vjeç, ka lënë gjurmë të pashlyeshme në futbollin anglez duke kaluar pjesën më të madhe të karrierës së tij te Manchester United, klub me të cilin ka ngritur lart pesë herë trofeun e Premier League.