Kurti nga ekzekutivi: Do të ndërmarrim çdo hap të mundshëm për korrigjimin e vendimit ndaj ish-krerëve të UÇK-së

Kryeministri i Kosovës, Albin Kurti, ka bërë të ditur se gjatë vizitës së tij në Shtetet e Bashkuara të Amerikës ka ngritur si shqetësim kryesor çështjen e vendimit të shkallës së parë ndaj ish-liderëve të Ushtrisë Çlirimtare të Kosovës në Dhomat e Specializuara. Gjatë mbledhjes së Qeverisë, kreu i ekzekutivit e ka cilësuar këtë vendim si “të padrejtë juridikisht e moralisht, dhe të pasaktë historikisht e faktikisht”, duke shprehur besimin se mangësitë dhe padrejtësitë e evidentuara do të korrigjohen përmes procedurës së apelit. “Mbrëmjen e së enjtes së 24 shtatorit u ktheva nga vizita në SHBA. Ishte vizitë e dendur, përplot takime me liderë e zyrtarë të lartë të shteteve mike të vendit tonë, por edhe me drejtues të institucioneve ndërkombëtare dhe me mërgatën tonë të çmuar”, ka deklaruar Kurti para kabinetit qeveritar. Ai shtoi se pos kësaj teme, gjatë bisedave në Washington ka trajtuar edhe fatin e personave të zhdukur gjatë periudhës së luftës në Kosovë. “Në secilin takim shpreha shqetësimin e thellë për aktgjykimin e shkallës së parë të Dhomave të Specializuara për ish-krerët e UÇK-së, i cili është i padrejtë juridikisht e moralisht, dhe i pasaktë historikisht e faktikisht. Presim që në apel të adresohen padrejtësitë dhe mangësitë e këtij aktgjykimi”, u shpreh ai. Kryeministri ka ndarë gjithashtu detaje nga takimet e ndara që ka mbajtur të dielën me kryetarin e Partisë Demokratike të Kosovës, Bedri Hamza, dhe atë të Lidhjes Demokratike të Kosovës, Lumir Abdixhiku. Sipas tij, në këto takime është diskutuar mbi koordinimin e veprimeve opozitë-pozitë lidhur me vendimin e shkallës së parë, si dhe për sfidat e përbashkëta politike dhe institucionale me të cilat ballafaqohet vendi. “Jemi takuar ndaras me Bedri Hamzën nga PDK dhe Lumir Abdixhikun nga LDK për të diskutuar lidhur thellësisht me veprimet e përbashkëta në raport me aktgjykimin e padrejtë dhe të rëndë të 16 shtatorit, por edhe për sfidat që na presin në aspektin institucional, politik e shtetëror”, theksoi Kurti. Për më tepër, ky zhvillim vjen në një periudhë kur spektri politik është angazhuar rreth hapave pasues pas datës 16 shtator. Më 28 shtator, Kuvendi i Kosovës votoi unanimisht me 99 vota pro, pa asnjë votë kundër dhe pa abstenime, një deklaratë zyrtare lidhur me këtë aktgjykim. Kurti e ka vlerësuar këtë votim si një lëvizje të rëndësishme fillestare. “Deklarata e miratuar me 99 vota pro në Kuvend është hapi i parë i përbashkët, që më shumë se që krijon efekt juridik është shprehje e vullnetit të popullit përmes të zgjedhurve të tij”, tha ai. Në këtë linjë, i pari i Qeverisë ka kërkuar unitet dhe bashkëpunim të ngushtë ndërpartiak rreth kësaj çështjeje nacionale, duke theksuar domosdoshmërinë e bashkërendimit me ekipet mbrojtëse të ish-krerëve të UÇK-së. “Mirëpres dhe përshëndes këtë hap fillestar, teksa thërras në bashkëpunim të ngushtë ndërmjet subjekteve politike për këtë çështje të interesit shtetëror, duke bashkërenduar me kujdes veprimet me ekipet mbrojtëse, që të mos gjendemi në situata që vendimet tona do të mund t’i përdornin si rëndesë apo dëm të 4-shes së UÇK-së”, ka deklaruar Kurti. Duke përmbyllur fjalën e tij, ai rikonfirmoi angazhimin e plotë institucional për të kundërshtuar këtë vendim gjyqësor. “Si kryeministër do të bëjmë gjithçka që dimë e mundemi bashkë me kolegët nga Qeveria e jo vetëm për korrigjimin e këtij aktgjykimi kur të vijë apeli e drejt tij”, u shpreh ai. Në fund, Kurti ka rikujtuar rëndësinë historike dhe rolin e Ushtrisë Çlirimtare të Kosovës gjatë luftës së viteve 1998-1999. “UÇK-ja lindi si përgjigje ndaj represionit, vrasjeve e masakrave dhe ajo ishte bartëse e luftës së drejtë të popullit”, përfundoi kryeministri.