Gruda lëshon kritika të ashpra: Mosfutja e ligjit për Dhomat e Specializuara në Qeveri është absurde

Deputeti i Partisë Demokratike të Kosovës (PDK), Përparim Gruda, ka shprehur pakënaqësi të thellë ndaj ekzekutivit për shkak të anashkalimit të projektligjit për Dhomat e Specializuara nga rendi i ditës në mbledhjen e qeverisë, duke e vlerësuar një veprim të tillë si të pakuptimtë dhe të papranueshëm. Gjatë një deklarimi para mediave paraprakisht në takimin e grupit parlamentar të PDK-së, Gruda theksoi se ky proces duhet trajtuar me prioritet absolut, teksa nuk i kurseu kritikat as ndaj Komisionit për Legjislacion për mosfutjen e kësaj teme në shqyrtim. “Për ne është absurde që qeveria sot nuk e ka në rend dite dhe komisionet parlamentare, veçanërisht komisioni për legjislacion, nuk e ka sot në rend dite. Është e papranueshme, nuk mund të ketë çështje më prioritare se kjo. Është e pashpjegueshme kjo mungesë e vetëdijes, e ndërgjegjes kombëtare me këtë rast”, u shpreh ai. Në vijim, zyrtari i lartë i PDK-së rikonfirmoi qëndrimin e bërë publik edhe nga kryetari i partisë, Bedri Hamza, lidhur me procesin e zgjedhjes së presidentit të vendit, duke bërë të qartë se subjektet politike nuk do të ulen për të dialoguar për këtë post pa u finalizuar përfundimisht çështja e ligjit për Dhomat e Specializuara. “Ne e kemi të qartë pozicionin që e ka thënë kryetari Hamza. Ne diskutojmë për presidentin vetëm kur çështja e ligjit për Gjykatën Speciale të mbyllet”, përfundoi Gruda.