Sherri zbulon arsyen e paraqitjes së zbehtë: Kundërshtari na përgjumë

Portieri Alen Sherri ka qenë ndër protagonistët kryesorë që spikatën në fushën e blertë të Serravalle-s mbrëmjen e kaluar, duke dhënë një paraqitje të shkëlqyer. Për 28-vjeçarin, kjo përballje rezultoi e përsosur, pasi e ruajti portën e paprekur dhe u shndërrua në lojtar kyç falë një ndërhyrjeje vendimtare në minutën e 58-të të takimit. “Jam i kënaqur me rezultatin që kemi arritur edhe pse loja ishte disi e përgjumur. Në këtë pikë mendoj se ndikoi shumë edhe rivali”, u shpreh gardiani kuqezi pas ndeshjes. Duke hedhur vështrimin te sfida e ardhshme, Sherri e ka vlerësuar me seriozitetin më të lartë transfertën e vështirë që i pret në Finlandë. “Mendoj se është një takim mjaft delikat pasi do të luhet mes dy skuadrash, të cilat luajnë për kreun e grupit”, përfundoi ai.