Hije dyshimi mbi Manchester Cityn: Akuzat financiare dhe skenari i së ardhmes së Haalandit

Manchester City po kalon një periudhë tejet të ndjeshme, pasi një komision i pavarur i Premierligës e ka shpallur klubin fajtor për 114 nga 115 shkeljet e rregullave financiare që pretendohet se janë kryer mes viteve 2008 dhe 2019. Edhe pse procesi i ankimimit dhe shqyrtimit mbetet i hapur, vendimi përfundimtar nuk pritet të bëhet i ditur para verës së ardhshme. Një zhvillim i tillë mund të sjellë pasojë të drejtpërdrejta në dinamikat e kampionatit, lëvizjet në merkato dhe qëndrueshmërinë afatgjatë të projektit sportiv të këtij ekipi. Pavarësisht horizontit të pasigurt, drejtuesit e klubit anglez kishin marrë masa paraprake. Gjatë vitit 2025, rinovimi i kontratës me Erling Haalandin ndezi debate të shumta në opinionin sportiv. Marrëveshja e re e sulmuesit nga Norvegjia u shtri deri në vitin 2034, duke zëvendësuar atë të mëparshmen që skadonte në vitin 2027. Qëllimi i drejtuesve ishte të mos lejonin që sulmuesi t'i afrohej vitit të fundit të kontratës në verën e vitit 2026. Në këtë mënyrë, klubi synonte të bllokonte çdo tentativë të mundshme nga Real Madridi apo gjigantët e tjerë evropianë, duke i dërguar njëkohësisht një sinjal të qartë opinionit publik dhe Premierligës se ambiciet e projektit nuk ndalen. Këto lëvizje u bënë në një kohë kur akuza për 115 shkeljet ishte tashmë e njohur, pasi ishte bërë publike që në shkurt të vitit 2023. Seanca dëgjimore kishte përfunduar në dhjetor 2024, pikërisht në kohën kur po zhvilloheshin bisedimet për kontratën e re të sulmuesit kryesor. Për vetë yllin norvegjez, çështja e akuzave nuk ka përbërë kurrë ndonjë motiv për ankth. “Nuk kam menduar për këtë. Kam besim se klubi e di se çfarë po bën”, pati deklaruar ai gjatë asaj periudhe. Sipas burimeve, madje edhe në muajt e verës që shkuan, Haaland nuk vendosi në kontratë ndonjë klauzolë të veçantë që do të hynte në fuqi po qe se skuadra do të pësonte rënie nga kategoria. Ndonëse marrëveshja afatgjatë deri në vitin 2034 dëshmon një angazhim të fortë sportiv e strategjik ndaj ngjyrave të klubit, ajo nuk mund të interpretohet si një garanci absolute për ta mbajtur futbollistin me forcë, nëse Manchester City do të përballet realisht me një dënim drastik të largimit nga elita e futbollit anglez.