Operacioni masiv në Pejë: Aktakuzë për 9 persona pas sekuestrimit të mbi një ton kanabisi

Prokuroria Themelore në Pejë ka formalizuar hetimet duke ngritur aktakuzë ndaj nëntë personave, të cilët akuzohen për përfshirje në kultivimin dhe shpërndarjen e substancave narkotike. Sipas dosjes hetimore, në dy lokacione të ndryshme, konkretisht në fshatrat Kliqinë dhe Sverkë, ishin mbjellë gjithsej 2,850 bimë kanabis. Nga ky operacion, i finalizuar më 27 shtator 2024 nga Policia e Kosovës, është arritur të sekuestrohet sasia prej 1,035 kilogramë e 712 gramë lloj kanabis sativa, e cila ishte përfituar nga kultivimi i këtyre bimëve. Të pandehurit e përfshirë në këtë çështje, të identifikuar si E.M., E.E., E.I., K.Q., Sh.Xh., M.Q., I.B., L.H. dhe E.H., dyshohet se kanë operuar të organizuar si grup. Ata akuzohen se janë kujdesur për çdo fazë, duke përfshirë mbjelljen, kultivimin, korrjen, tharjen, përpunimin, si dhe sigurimin e infrastrukturës dhe mjeteve të transportit për lëndët narkotike. Në kuadër të marrëveshjeve mes tyre, njëri nga anëtarët e grupit kishte marrë premtimin se do të shpërblehej me shumën prej 15 mijë eurosh për angazhimin e tij në këtë aktivitet të paligjshëm. Gjatë kontrolleve të kryera nga organet e rendit, njëri nga të dyshuarit është kapur edhe në posedim të 1,540 eurove në kartëmonedha të falsifikuara, të cilat dyshohet se kishin për qëllim futjen në treg dhe qarkullim monetar. Përveç akuzave që lidhen drejtpërdrejt me narkotikët, njëri nga të pandehurit do të përballet edhe me veprën penale të falsifikimit të parasë. Po ashtu, një tjetër pjesëtar i këtij grupi akuzohet për armëmbajtje pa leje, pasi gjatë bastisjes policore atij iu gjet dhe iu sekuestrua një armë e gjatë e llojit AK-47 së bashku me municionin përkatës. Sipas njoftimit zyrtar të Prokurorisë, aksioni i ndërmarrë më 27 shtator rezultoi me zbulimin e 2,850 bimëve të kanabis sativës dhe konfiskimin e mbi një toni drogë të gatshme. Të pandehurit ngarkohen penalisht për veprat "Kultivimi i bimës së hashashit, shkurres së kokainës ose bimëve të kanabisit" dhe "Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge", si dhe për vepra të tjera që dolën gjatë hetimeve.