WhatsApp sjell risi në ndërfaqe: Ja si do të transformohet shiriti i navigimit

WhatsApp po ndërmerr hapa konkretë drejt një pamjeje të re për aplikacionin e tij, duke eksperimentuar me një dizajn të freskët të shiritit të navigimit në versionin beta. Këto ndryshime, megjithatë, ndodhen ende në një fazë fillestare, çka nënkupton se vizualizimi aktual mund të mos jetë versioni final që do të shohin përdoruesit. Një nga detajet që bie në sy në pamjet e publikuara është pozicionimi i butonit të 'Meta AI'. Fakti që ky buton shfaqet në vende të ndryshme tregon se zhvilluesit janë ende në proces vendimmarrjeje për pozicionimin e tij ideal. Megjithatë, gjithçka tregon se Meta AI pritet të integrohet drejtpërdrejt brenda shiritit të navigimit, duke zëvendësuar formën aktuale të një butoni lundrues mbi opsionin për krijimin e mesazheve të reja. Përtej integrimit të inteligjencës artificiale, WhatsApp po punon për të modernizuar estetikën e shiritit të navigimit. Ky element pritet të marrë një formë më të rrumbullakosur dhe ovale, duke adoptuar një pamje gjysmë-transparente që i përafrohet stilit të versionit për iOS. Megjithatë, për përdoruesit e Android, shiriti nuk do të jetë plotësisht transparent, ndërsa dizajni është planifikuar që të jetë plotësisht i përshtatshëm edhe për ata që preferojnë 'Dark Mode' (modalitetin e errët). Këto ndryshime janë identifikuar në versionin beta 2.26.38.10 për Android, i cili aktualisht është i hapur vetëm për testuesit e programit përkatës. Duke qenë se procesi i zhvillimit është në hapat e parë, WhatsApp mund të bëjë ende modifikime të shumta përpara se ky ridizajnim të bëhet i disponueshëm për publikun e gjerë, proces ky që mund të kërkojë edhe disa javë kohë.