Ngjarje tronditëse në Brazil: 18-muajshi arratiset nga çerdhja dhe shkon i vetëm në punën e nënës

Një ngjarje sa e pabesueshme, aq edhe shqetësuese, ka ndodhur në Braço do Norte të Brazilit, ku një fëmijë vetëm 18 muajsh ka arritur të dalë i pashoqëruar nga çerdhja dhe të përshkojë rreth 50 metra në këmbë për të gjetur të ëmën në vendin e saj të punës. Pamjet e siguruara nga kamerat e sigurisë kanë kapur momentet dramatike të vogëlushit teksa ecte i vetëm në rrugë. Gjatë këtij rrugëtimi të rrezikshëm, fëmija është rrëzuar teksa përpiqej të ngjitej në trotuar, por nuk është dorëzuar; ai është ngritur sërish për të vijuar marshimin drejt destinacionit të tij. Fëmija ka mbërritur pa u lënduar deri te ndërtesa ku punonte e ëma, duke trokitur në derën e xhamtë. Një recepsioniste, e cila vuri re praninë e fëmijës së vetmuar, reagoi menjëherë duke e futur brenda dhe duke bërë të mundur ribashkimin e tij me nënën. Sipas rrëfimit të nënës, ajo e kishte dërguar djalin në çerdhe rreth orës 07:20, ndërsa largimi i tij kishte ndodhur rreth orës 08:45. Dyshohet se shkaku i kësaj shkujdesjeje ka qenë një portë e dëmtuar e institucionit, i cili në ato momente ishte nën proces punimesh. Autoritetet lokale të arsimit dhe policia kanë nisur një hetim të detajuar për të përcaktuar shkaqet e këtij incidenti dhe për të vendosur mbi përgjegjësitë ligjore të stafit të çerdhes. Ndërkohë, familja ka marrë vendimin që ta transferojë fëmijën në një tjetër institucion parashkollor.