Tensione në kampin portugez: Cristiano Ronaldo mungon në stërvitje, shtohen dyshimet për përplasje me Zhezusin

Ndonëse fitorja e thellë ndaj Norvegjisë ka konfirmuar se Portugalia e drejtuar nga Zhorge Zhezus është një pretendente serioze për trofe, atmosfera brenda ekipit është turbulluar nga rikthimi i të ashtuquajturës “çështja Ronaldo”. Ylli portugez e përjetoi ndeshjen e fundit tërësisht nga pankina, duke e vëzhguar suksesin e shokëve të tij pa u aktivizuar asnjë minutë. Kjo situatë, e paprecedentë që nga viti 2008 për kapitenin portugez, ka ndezur alarmin në mediat vendase. Në seancën e sotme stërvitore, e cila shënonte nisjen e përgatitjeve për duelin e radhës ndaj Danimarkës, mungesa e Ronaldos në fushë nuk kaloi pa u vënë re. Ndërkohë që pjesa tjetër e grupit po punonte për takimin e ardhshëm, Ronaldo u fotografua duke shijuar një kafe, një veprim që po interpretohet si një shenjë pakënaqësie. I njëjti qëndrim u vërejt edhe te Zhoao Feliks, i cili aktualisht përfaqëson boshtin e sulmit të luzitanëve. Pas momentit të relaksimit, Ronaldo u drejtua për në hotel, ku zhvilloi një seancë të veçantë stërvitore në palestër, ndërsa pjesa tjetër e ekipit vazhdoi punën në fushat e blerta. Opinionistët sportivë në Portugali tashmë po e shohin këtë sjellje si një indikator të qartë të një krisjeje në marrëdhënien mes lojtarit dhe trajnerit Zhezus. Mungesa e Ronaldos në ndeshjen e fundit duket se ka lënë gjurmë, dhe situata pritet të prodhojë zhvillime të reja në ditët në vijim, ndërsa presioni mbi kombëtaren portugeze sa vjen e rritet.