Politikë
Fati i të pagjeturve të Kosovës: A do të jetë ky testi i vërtetë për ndryshimet politike në Beograd?
Reklamë e Sponsorizuar
Çështja e personave të zhdukur gjatë luftës në Kosovë vazhdon të mbetet një plagë e hapur dhe një nga sfidat më të dhimbshme të pasluftës. Edhe pas dy dekadash, familjarët e të rrëmbyerve nga forcat serbe jetojnë në ankth, duke pritur një të vërtetë që varet tërësisht nga vullneti politik i Serbisë për të zbardhur arkivat e errëta të luftës dhe për të treguar lokacionet e varrezave masive.
Zbulimi i fundit i mbetjeve mortore në Shtërpcë më 12 nëntor, ku u identifikuan edhe tre anëtarë të të ashtuquajturit “Grup i Intelektualëve”, e ka rikthyer urgjencën e kësaj teme në qendër të vëmendjes. Ky zhvillim ka nxitur pyetje të shumta mbi rolin e forcave të reja politike në Serbi, përfshirë Listën Studentore, e cila, pavarësisht kritikave ndaj presidentit Aleksandar Vuçiq, ende nuk ka artikuluar një qëndrim të qartë dhe të guximshëm mbi krimet e kryera në Kosovë.
Shtrohet pyetja thelbësore: a do të jetë pushteti i ri në Serbi i gatshëm të hapë dosjet e rënda ushtarake dhe policore për të ndihmuar në zbardhjen e fatit të mijëra të zhdukurve? Gjithashtu, a duhet që Kosova ta shndërrojë këtë çështje në kusht për dialogun, duke pasur parasysh se normalizimi i raporteve është i pamundur pa u mbyllur kapitulli i të pagjeturve? Lidhur me këto dilema, për 'Lajmet e Reja' kanë folur publicisti Lis Bukuroca dhe eksperti i sigurisë, Fidair Berisha.
Publicisti Lis Bukuroca shprehet skeptik për ndryshime të shpejta, duke theksuar se kundërshtimi ndaj Vuçiqit nuk nënkupton domosdoshmërisht një kthesë në politikën serbe ndaj Kosovës. 'Ndryshimi i pushtetit mund të hapë dritare të reja, por nuk duhet të na mashtrojë. Duhet të pyesim: a po kundërshtohet Vuçiqi sepse ishte autoritar, apo sepse nuk arriti ta gjunjëzojë Kosovën? Politika serbe mbetet thellësisht e ngjyrosur nga nacionalizmi', deklaroi Bukuroca.
Sipas tij, hapja e arkivave është prova e vërtetë e vullnetit për ndryshim. 'Nuk mjafton thjesht një rotacion pushteti në Beograd. Përballja me krimet e shtetit është e vetmja rrugë përpara. Fshehja e vendndodhjes së varrezave masive nuk mbron qytetarët, por vazhdon të mbajë nën mbrojtje kriminelët e luftës', përfundoi Bukuroca, duke nënvizuar se pritja e familjeve për drejtësi nuk mund të zvarritet pafundësisht.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: