Debati për vendimin e Hagës/ Altin Krasniqi kërkon nga ambasadori britanik të verifikojë faktet

Altin Krasniqi ka hyrë në një replikë të hapur me diplomatin e Mbretërisë së Bashkuar në Prishtinë, Jonathan Hargreaves, pasi ky i fundit deklaroi përmes një shkrimi se ish-krerët e Ushtrisë Çlirimtare të Kosovës janë shpallur fajtorë për krime individuale. Nëpërmjet një komenti publik, Krasniqi e ka ftuar shefin e misionit britanik që të tregojë kujdes dhe të kontrollojë më imtësisht të dhënat përpara se të dalë me qëndrime të tilla zyrtare. “Si mund të flitet për përgjegjësi individuale kur, siç tregon përmbledhja e vendimit, të akuzuarit nuk u gjetën përgjegjës për veprime individuale siç pretendohej, por u dënuan për shkak të roleve të tyre si udhëheqës politikë të organizatës ushtarake e cila, në bashkëpunim me vendin tuaj, ndihmoi në çlirimin e Kosovës?” ka shtruar pyetjen ai. Djali i Jakup Krasniqit – i cili u dënua nga gjykata në Hagë me 25 vjet heqje lirie – theksoi se deklarimet e kësaj natyre nuk i shërbejnë reputacionit të diplomatit e as shtetit britanik, duke kërkuar sërish verifikim të dokumenteve zyrtare. Më poshtë gjendet reagimi i plotë i Altin Krasniqit: I nderuar Ambasador, Do të vlerësohej shumë nëse faktet do të verifikoheshin me më shumë kujdes para se të bëheshin deklarata të tilla publike. Si mund të flitet për përgjegjësi individuale kur, siç tregon përmbledhja e vendimit, të akuzuarit nuk u gjetën përgjegjës për veprime individuale siç pretendohej, por u dënuan për shkak të roleve të tyre si udhëheqës politikë të organizatës ushtarake e cila, në bashkëpunim me vendin tuaj, ndihmoi në çlirimin e Kosovës? I njëjti vendim thekson se objektivi i të akuzuarve dhe i UÇK-së ishte pavarësia e Kosovës – një pavarësi që u arrit pikërisht me mbështetjen e vendit tuaj – dhe se dhuna u përdor kundër individëve që e kundërshtonin atë objektiv. Ambasador, ju bëj thirrje me respekt që t’i verifikoni faktet para se të bëni deklarata të tilla publike. Deklaratat e kësaj natyre nuk i bëjnë nder as jush dhe as vendit që përfaqësoni, të cilit populli i Kosovës i mbetet thellësisht mirënjohës për mbështetjen e dhënë.