AAK mblidhet për çështjet urgjente: Qëndrimi për Specialen dhe shqetësimi për zgjedhjen e presidentit

Kryesia e Aleancës për Ardhmërinë e Kosovës ka zhvilluar sot mbledhjen e saj të radhës, takim ky i zhvilluar në një periudhë të ndjeshme politike, pas zhvillimeve të fundit nga Gjykata Speciale në Hagë dhe në prag të skadimit të afateve kushtetuese për zgjedhjen e kreut të shtetit. Kryetari i kësaj partie, Ardian Gjini, ka bërë të ditur se AAK-ja ruan qëndrimin e saj të pandryshueshëm ndaj Gjykatës Speciale. Ai ka kërkuar nga të gjithë akterët që mbështetja ligjore për krerët e UÇK-së në Hagë dhe mbrojtja e integritetit shtetëror të Kosovës të mbeten procese të ndara nga agjendat dhe interesat e ngushta partiake. Sipas Gjinit, zvarritja e procesit për zgjedhjen e presidentit është shqetësuese. Ai paralajmëroi se çdo manovrim me afatet apo dërgimi i lëndëve të reja në Gjykatën Kushtetuese në këtë moment, vetëm sa do të thellojë paqartësinë politike dhe do të rëndojë situatën për qytetarët e vendit. Duke reflektuar mbi rolin e AAK-së, Gjini nënvizoi se partia që ai drejton ka dëshmuar vazhdimisht konstruktivitet dhe konsistencë në trajtimin e temave që ndërlidhen me të kaluarën historike, stabilitetin aktual dhe perspektivën e brezave të ardhshëm. Në përmbyllje të qëndrimit të tij, kryetari i Aleancës u zotua se subjekti politik që ai përfaqëson do të vijojë angazhimin e palëkundur për ruajtjen e rendit kushtetues, duke synuar rikthimin e normalitetit institucional dhe nxitjen e zhvillimit socio-ekonomik për të gjithë qytetarët e Kosovës.