Kronikë
Kompania 'VITA' kërkon ndërhyrjen e Prokurorisë: Dyshime për obstruksion dhe mungesë transparence në testimet e qumështit
Reklamë e Sponsorizuar
Qumështorja e njohur 'VITA' ka ndërmarrë hapa ligjorë duke kërkuar një hetim të detajuar nga Prokuroria e Shtetit, pas pretendimeve për tejkalim të nivelit të aflatoksinës M1 në një prej loteve të saj të prodhimit. Kompania akuzon institucionet për mungesë transparence, duke theksuar se nuk i janë dorëzuar rezultatet e mbi 30 inspektimeve të kryera gjatë periudhës së fundit.
Në një deklaratë publike, drejtuesit e kompanisë shprehën shqetësimin e thellë për presionin e vazhdueshëm që nga data 2 korrik. Sipas të dhënave të tyre, gjatë këtij harku kohor janë marrë mbi 650 mostra, mirëpo kompania pretendon se është lënë në terr informativ sa i përket gjetjeve laboratorike të këtyre testeve.
Kompania rikujton se ndaj saj janë hedhur akuza të ndryshme në të kaluarën, si për përdorimin e vajit të palmës, qumështit pluhur apo ujit të pusit, pretendime të cilat, sipas tyre, nuk kanë gjetur asnjëherë konfirmim faktik. Lidhur me rastin e fundit, 'VITA' sqaron se bëhet fjalë për një mostër të vetme prej një litri, e cila është përdorur si bazë për të vënë në dyshim standardet e tyre të prodhimit.
Duke theksuar historikun 25-vjeçar të operimit pa asnjë incident shëndetësor, kompania nënvizoi se posedon certifikata ndërkombëtare të sigurisë ushqimore si IFS Food, HACCP dhe Halal. Përfaqësuesit e saj shprehën dyshime se ky trajtim mund të jetë i qëllimshëm dhe joobjektiv, duke kërkuar nga Prokuroria që të zbardhë të gjithë zinxhirin e procedurave, që nga marrja e mostrës e deri te publikimi i rezultateve.
Në këtë drejtim, 'VITA' kërkon qasje të menjëhershme në dokumentacionin laboratorik dhe një verifikim të pavarur të mostrës së kontestuar. Për konsumatorët, kompania garantoi se produktet e saj vazhdojnë të përpunohen nga 100 për qind qumësht i fermerëve vendorë.
'Ne nuk kërkojmë privilegje, por drejtësi dhe trajtim të barabartë. Kërkojmë që e vërteta të dalë në dritë për hir të konsumatorëve dhe integritetit tonë', thuhet në reagimin zyrtar të kompanisë.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: