Aktuale
KEDS: Furnizimi me energji elektrike është stabil, po bëhen përgatitje për sfidat e dimrit
Reklamë e Sponsorizuar
Erërat e fuqishme që kanë përfshirë Kosovën gjatë ditëve të fundit kanë shkaktuar ndërprerje të përkohshme të furnizimit me energji elektrike në disa rajone. Ky situatë ka shtuar numrin e ankesave të konsumatorëve drejtuar Kompanisë për Distribuimin e Energjisë Elektrike (KEDS).
Zëdhënësi i KEDS-it, Adlum Ramadani, ka bërë të ditur se ankesat po trajtohen me përparësi dhe në kohë rekord. Ai theksoi se ekipet teknike intervenojnë menjëherë pas çdo njoftimi për ndërprerje, me qëllim rikthimin sa më të shpejtë të rrymës. Sipas tij, aktualisht situata është e stabilizuar, ku rreth 99,99 për qind e konsumatorëve në të gjithë vendin janë duke u furnizuar rregullisht.
Në lidhje me përgatitjet për stinën e dimrit, Ramadani deklaroi se kompania ka realizuar investimet e nevojshme dhe mirëmbajtjen parandaluese për të garantuar një rrjet sa më të qëndrueshëm. Megjithatë, ai shtoi se qëndrueshmëria e furnizimit varet edhe nga rrethana të tjera për të cilat KEDS-i nuk ka kompetencë, duke iu referuar mundësisë së mungesës së prodhimit apo importit të energjisë.
Për të marrë një pasqyrë më të plotë mbi gjendjen energjetike, janë dërguar pyetje edhe në drejtim të Korporatës Energjetike të Kosovës (KEK) dhe Operatorit të Sistemit, Transmisionit dhe Tregut (KOSTT), mirëpo këto institucione nuk kanë kthyer përgjigje deri në momentin e publikimit të këtij lajmi.
Ndërkohë, pas paralajmërimeve të ministres Artane Rizvanolli për një dimër të vështirë energjetik, aktivistët e Lëvizjes Revolta kanë zhvilluar një aksion simbolik para zyrave të KEDS-it. Ata kanë shprehur kundërshtinë e tyre përmes një mesazhi ku theksohet se vështirësitë gjatë dimrit do t'i përballojnë vetëm qytetarët, ndërsa qeveritarët, sipas tyre, do të përfitojnë financiarisht.
Reklamë e Sponsorizuar
Ky artikull është përgatitur dhe verifikuar nga redaksia e Lajmet e Reja. Të gjitha të drejtat janë të rezervuara.
Reklamë e Sponsorizuar
Shpërndaj këtë lajm: