Tërmet në futbollin anglez: Manchester City shpallet fajtor për shkelje masive financiare dhe manipulim të shifrave

Klubi i Manchester Cityt është shpallur zyrtarisht fajtor për të gjitha akuzat kryesore lidhur me shkeljet e rënda të rregullave financiare të Ligës Premier, pas përfundimit të një procesi të gjatë hetimor nga ana e një Komisioni të Pavarur. Sipas njoftimit të Ligës Premier, parregullsitë e konstatuara përfshijnë harkun kohor nga sezoni 2009/10 deri në atë 2017/18. Komisioni ka dalë në përfundimin se skuadra angleze kishte përdorur një seri marrëveshjesh komerciale të cilësuara si “të rreme”, përmes të cilave të ardhurat e klubit ishin fryrë në mënyrë artificiale, ndërkohë që shpenzimet ishin paraqitur dukshëm më të ulëta se në realitet. Në bazë të gjetjeve të hetimit, në qendër të kësaj skeme ishin kontratat e sponsorizimit ku kompanitë partnere paguanin vetëm një pjesë të vlerës së deklaruar, kurse pjesa tjetër mbulohej fshehurazi nga Abu Dhabi United Group (ADUG), pronari zyrtar i klubit. Komisioni konfirmoi se këto mekanizma financiarë ndikuan drejtpërdrejt në pasqyrimin e gjendjes ekonomike të Manchester Cityt gjatë periudhës në fjalë. Dokumentet e publikuara nga Liga Premier dëshmojnë se qëllimi kryesor i këtyre veprimeve ishte rritja artificiale e të ardhurave dhe minimizimi i kostove me mbi 900 milionë funte, shifër kjo që përkthehet në afro 1 miliard euro, me qëllim që klubi të dukej se respektonte normat e fair-play-t financiar. Gjithashtu, Komisioni zbuloi se Manchester City kishte dorëzuar pasqyra llogarie të pasakta dhe kishte fshehur të dhëna thelbësore financiare nga auditorët dhe institucionet rregullatore të futbollit. Në vendim theksohet se, po të ishin deklaruar saktësisht këto transaksione, klubi do të kishte shkelur rëndë kufijtë e lejuar të shpenzimeve të Ligës Premier dhe rregulloret e UEFA-s. Për sa i përket masës ndëshkimore, ajo pritet të caktohet në një fazë të dytë. Liga Premier ka njoftuar se ky hap i radhës do të shqyrtohet sërish nga Komisioni i Pavarur në një seancë të mbyllur dhe konfidenciale, deri në momentin kur vendimi përfundimtar të jetë gati për t'u bërë publike.