Musliu-Shoshi takon delegacionin nga Finlanda: Drejtësia në Hagë dhe e vërteta e Kosovës në fokus të bisedës

Deputetja e Partisë Demokratike të Kosovës, Ariana Musliu-Shoshi, e cila u shoqërua në këtë takim nga Janina Ymeri e Lidhjes Demokratike të Kosovës dhe Krenare Çerkini e Lëvizjes Vetëvendosje, ka zhvilluar një takim zyrtar me një delegacion nga Finlanda. Takimi u zhvillua në ambientet e Kuvendit të Kosovës, ku palët trajtuan çështje të rëndësishme politike, ndër të cilat u veçua vendimi i fundit i Gjykatës Speciale ndaj ish-krerëve të Ushtrisë Çlirimtare të Kosovës. Gjatë bisedës, deputetja Musliu-Shoshi shprehu hapur shqetësimin e saj rreth këtij vendimi, duke e cilësuar si të padrejtë. Ajo insistoi se në përpjekjet për të mbrojtur të vërtetën historike të vendit, mbështetja dhe zëri i partnerëve dhe aleatëve ndërkombëtarë mbeten jetike për Kosovën. Nëpërmjet një postimi ku ndau detajet e takimit, ajo theksoi: “Sot, në takimin me delegacionin finlandez, një pjesë të rëndësishme të diskutimit ia kushtova vendimit të padrejtë të Gjykatës Speciale ndaj çlirimtarëve tanë. Theksova se në mbrojtjen e së vërtetës sonë, Kosova ka nevojë për zërin dhe mbështetjen e miqve dhe aleatëve të saj. Diskutuam gjithashtu për demokracinë, bashkëpunimin ndërparlamentar dhe fuqizimin e grave dhe të rinjve në politikë”.