Operacion i BIA-s në Serbi: Prangosen dy persona të dyshuar për bashkëpunim me inteligjencën shqiptare dhe kosovare

Agjencia e Sigurisë dhe Informacionit e Serbisë (BIA) ka ndërmarrë një aksion të gjerë, gjatë të cilit janë arrestuar dy persona nën dyshimet e forta për veprën penale të spiunazhit në favor të shërbimeve inteligjente shqiptare. Sipas informacioneve zyrtare të autoriteteve atje, operacioni është finalizuar në Vranjë dhe Jagodinë. Të dyshuarve u janë vënë prangat; bëhet fjalë për shtetasin D.C. (46) nga fshati Shillovë i Gjilanit, si dhe për N.P. (50) me banim në Jagodinë. Organet e rendit në Serbi pretendojnë se të arrestuarit kanë bashkëpunuar ngushtë me Shërbimin Informativ Shtetëror të Shqipërisë (SHISH), Agjencinë e Inteligjencës së Kosovës (AKI), si dhe me strukturën e inteligjencës pranë Policisë së Kosovës, duke iu përcjellë atyre informacione të ndjeshme. Sipas pretendimeve të publikuara, materiali i mbledhur dyshohet se përfshinte të dhëna konfidenciale mbi agjentët aktivë të BIA-s dhe operacionet e tyre në terren. Në kuadër të hetimeve, forcat e sigurisë kanë ushtruar kontroll të detajuar në banesën e të dyshuarit N.P. në Jagodinë, veprim ky i ndërmarrë me urdhër të gjykatës kompetente. Gjatë këtij kontrolli, hetuesit kanë sekuestruar disa pajisje elektronike dhe materiale të ndryshme provuese, të cilat do t'enënshtrohen ekzaminimeve të mëtejshme për të zbardhur plotësisht rrethanat e këtij rasti.