Ambasadori britanik pas zhvillimeve në Hagë: Londra do të mbrojë fuqishëm shtetësinë dhe të ardhmen e Kosovës

Ambasadori i Mbretërisë së Bashkuar në Kosovë, Jonathan Hargreaves, ka ndërmarrë një vizitë në pikën kufitare të Hanit të Elezit, pikërisht në vendin ku në qershor të vitit 1999 trupat britanike hynë në territorin e Kosovës për të ndalur spastrimin etnik që kishte nisur Serbia. Përmes një adresimi publik, diplomati britanik ka theksuar se qasja shkatërruese e regjimit të Slobodan Millosheviqit rezultoi në krime lufte dhe dhunë të dokumentuar gjerësisht në vend. "Mbretëria e Bashkuar është krenare për rolin e saj në Kosovë në vitin 1999 dhe më pas. Ajo mbetet e palëkundur në mbështetjen e saj për drejtësi ndërkombëtare, llogaridhënie dhe respekt për vendimet e gjykatave ndërkombëtare. Kosova mori vendimin e vështirë për të krijuar dhe mbështetur Dhomat e Specializuara, duke e ditur se ato mund të hetonin disa nga figurat më të shquara në organizatat që ishin qendrore në luftën e saj çlirimtare. Kosova mund të jetë krenare për gatishmërinë e saj të vazhdueshme për të mbështetur parimin se asnjë individ nuk është mbi ligjin. Ky është një shembull i rëndësishëm për rajonin në tërësi", ka shkruar Hargreaves. Më tej, ai ka sqaruar se vendimet e fundit nga Haga nuk përfaqësojnë aspak një gjykim ndaj shtetësisë, sovranitetit apo të drejtës legjitime të Kosovës për të përcaktuar fatin e saj, duke rikonfirmuar se Londra zyrtare do të vazhdojë t'i dalë zot me vendosmëri kësaj të ardhmeje. Në postimin e tij të plotë, Hargreaves ka sjellë në vëmendje historikun e ndërhyrjes së NATO-s në qershor të vitit 1999, e cila u bë në bazë të Rezolutës 1244 të Këshillit të Sigurimit të OKB-së, për të frenuar dhunën ndaj civilëve dhe dëbimin me dhunë të qindra mijëra shqiptarëve etnikë, teksa Millosheviqi kishte hedhur poshtë çdo alternativë paqeje. Ai gjithashtu ka vënë në pah se vendimet e fundit gjyqësore fokusohen te përgjegjësitë penale individuale për krime të kryera ndaj viktimave nga etnicitete të ndryshme, ndërsa ka kujtuar se të dënuarve u takon e drejta e apelimit të vendimeve. Në fund, ambasadori britanik ka përsëritur përkushtimin e palëkundur të shtetit të tij ndaj zbardhjes së së vërtetës në Ballkanin Perëndimor, nxitjes së pajtimit afatgjatë dhe bashkëpunimit të ngushtë me aleatët rajonalë e ndërkombëtarë për të siguruar paqe, drejtësi dhe një perspektivë të begatë për të gjitha komunitetet.