BDI hedh poshtë akuzat: Qeveria aktuale 'dha dritën jeshile' për hyrjen e bankës serbe në treg

Sekretari i përgjithshëm i Bashkimit Demokratik për Integrim (BDI), Arbër Ademi, ka hedhur dritë mbi procesin e blerjes së Stopanska Bankës në Manastir nga Alta Banka e Beogradit. Në një konferencë për media, ai ka prezantuar dokumentacion zyrtar, duke hedhur poshtë pretendimet e koalicionit qeverisës OBRM-PDUKM-VLEN se përgjegjësia për këtë transaksion qëndron te ish-qeverisja. Ademi ka argumentuar se tentativat e ekzekutivit aktual për të zhvendosur fajin janë të pabaza, pasi vendimet kyçe që mundësuan depërtimin e bankës serbe në tregun tonë janë marrë përgjatë vitit 2025. “Qeveria e Mickoskit dhe VLEN-it po mundohet të mjegullojë të vërtetën, por dokumentet flasin qartë se përgjegjësia është e tyre”, deklaroi Ademi. Duke sqaruar kontekstin e vitit 2023, Ademi theksoi se vendimi i 24 tetorit të atij viti kishte të bënte ekskluzivisht me mbrojtjen e interesave shtetërore mbi aksionet e trashëguara nga ish-Jugosllavia. Ai sqaroi se Qeveria e kaluar kishte angazhuar Avokaturën Shtetërore për të mbrojtur këto aksione përballë legjislacionit serb, pa pasur asnjë ndërlidhje me operacionet e Alta Bankës në Maqedoninë e Veriut. Sipas dokumentacionit të publikuar nga Ademi, procesi i marrjes së Stopanska Bankës mori hov gjatë mandatit të qeverisë së tanishme. Ai përmendi pëlqimin paraprak nga Banka Popullore më 1 shtator 2025 dhe vendimin e Komisionit të Letrave me Vlerë më 10 shtator, të nënshkruar nga kryetarja Bujare Abazi, e cila është kuadër i VLEN-it. Ky vendim, i botuar në Gazetën Zyrtare më 22 shtator 2025, shënon hapin formal drejt finalizimit të blerjes. Në vijim, Ademi vuri në dukje se më 23 shtator 2025, me propozim të ministres së Financave, Gordana Dimitrieska-Koçoska, Qeveria udhëzoi 16 institucione publike që të shqyrtojnë ofertën e Alta Bankës. Kjo, sipas tij, dëshmon se pushteti aktual jo vetëm që ishte në dijeni, por u bë palë aktive në lehtësimin e këtij procesi. Me këto fakte, Ademi vlerësoi se narrativa e pushtetit për ta paraqitur këtë zhvillim si trashëgimi të së kaluarës është thjesht një manovër politike, ndërkohë që në tetor të vitit 2025 oferta e Alta Bankës për Stopanska Bankën u bë realitet nën mbikëqyrjen e plotë të institucioneve të qeverisë aktuale.