Ndryshime në krye të PS-së në Tiranë: Albana Koçiu emërohet bashkëkryetare, ja zotimi i saj

Partia Socialiste ka ndërmarrë lëvizje të reja në strukturat drejtuese të degës së Tiranës. Gjatë mbledhjes së Asamblesë Kombëtare, kryeministri Edi Rama ka vendosur që Albana Koçiu t'i bashkohet Ervin Demos në postin e bashkëkryetares së Partisë Socialiste për kryeqytetin. Pas këtij vendimi, zëvendëskryeministrja Koçiu ka ndarë një mesazh falënderues në rrjetet sociale, ku shpreh mirënjohjen për besimin e treguar nga kreu i socialistëve. Ajo ka theksuar se fokusi i saj do të jetë puna e vazhdueshme dhe e drejtpërdrejtë në terren, duke mbuluar çdo lagje dhe njësi administrative të Tiranës. “Së bashku me Ervinin, Ogertën dhe çdo socialist të Tiranës, do të vijojmë punën në çdo lagje e në çdo njësi. Tirana, si kryeqyteti europian i të gjithë shqiptarëve, mbetet shembulli i zhvillimit dhe vendi ku krijohen mundësi të reja për çdo familje”, ka shkruar Koçiu. Sipas saj, ky angazhim është pjesë e një misioni më të gjerë për të përmbushur objektivat e Shqipërisë drejt integrimit në Bashkimin Europian. Koçiu e ka cilësuar këtë si një “kontratë besimi” me qytetarët, me synimin për të ofruar shërbime më cilësore dhe për të siguruar fitoren e Partisë Socialiste në kuadër të projektit #SHQIPËRIA2030.