Akuzat e rënda: Avokati Stojkoviq kërkon prangosjen e Vuçiqit për sabotim ekonomik

Avokati i njohur serb, Çedomir Stojkoviq, ka kërkuar sot arrestimin e menjëhershëm të ish-presidentit Aleksandar Vuçiq, duke e akuzuar atë për kryerjen e veprave të rënda penale që po dëmtojnë drejtpërdrejt stabilitetin ekonomik të Serbisë. Në një reagim publik përmes rrjeteve sociale, Stojkoviq argumentoi se veprimet e Vuçiqit synojnë krijimin e panikut tek investitorët e huaj. Sipas avokatit, qëllimi kryesor i kësaj fushate është destabilizimi dhe dështimi i qeverisë së re, e cila doli fituese nga zgjedhjet e 25 tetorit dhe udhëhiqet nga Lëvizja Studentore. “Është i nevojshëm një arrestim qytetar, jo për shkak të së kaluarës së tij, për të cilën hetimet mund të zhvillohen më vonë, por për shkak të veprimeve të tij aktuale. Ai po kontakton privatisht investitorët e huaj me të cilët ka bashkëpunuar më parë, duke u kërkuar atyre të tërhiqen nga projektet në Serbi. Kjo taktikë po përdoret për të mbjellë pasiguri dhe për të ndalur rrjedhën e kapitalit në vend”, ka deklaruar Stojkoviq. Sipas avokatit, këto ndërhyrje përbëjnë vepër penale, pasi Vuçiq po shfrytëzon ndikimin e tij për të shkaktuar trazira dhe panik ekonomik. Stojkoviq thekson se ish-presidenti madje po e pranon publikisht këtë sjellje destruktive. Si provë, Stojkoviq përmendi një deklaratë të xhiruar të Vuçiqit, ku ky i fundit flet hapur për një investitor nga Portugalia, të cilit i është kërkuar zyrtarisht të tërhiqet nga tregu serb, duke shfrytëzuar këtë rast për të nxitur frikë tek palët e tjera të interesuara.