Akuzat e bujshme të VLEN: Si u përfshi rrethi i Ali Ahmetit në hyrjen e ‘Alta Bankës’ në Maqedoni?

Zëvendësministri i Punëve të Brendshme, Astri Iseni, përfaqësues i koalicionit VLEN, ka hedhur akuza të rënda ndaj ish-strukturave të BDI-së dhe familjarëve të kreut të kësaj partie, Ali Ahmeti. Sipas Isenit, prapa hyrjes së “Alta Bankës” në tregun financiar të Maqedonisë së Veriut fshihet një skemë e dyshimtë financiare që përfshin oligarkun serb Davor Macura, aktualisht në paraburgim në Serbi, dhe lidhje të ngushta familjare të Ahmetit. Në një konferencë për media, Iseni sqaroi se si “Stopanska Banka” e Manastirit, e shndërruar më pas në “Alta Banka Maqedoni”, kaloi nën kontrollin e Macurës përmes blerjes së aksioneve nga kompania “AS Senjak” e Kërçovës. Kjo e fundit është në pronësi të Selahudin Arifit, i cili u cilësua nga zëvendësministri si krushk i Ali Ahmetit. Sipas kronologjisë së prezantuar nga Iseni, gjithçka nisi më 9 qershor 2025, kur një kompani e lidhur me rrethin familjar të Ahmetit mori një kredi prej 5 milionë eurosh nga selia qendrore e “Alta Bankës” në Beograd. Vetëm tre muaj më vonë, më 17 shtator 2025, kompania “AS Senjak” ia shiti aksionet e saj në bankën e Manastirit Davor Macurës, duke i hapur kështu rrugën zyrtare dominimit të tij në këtë institucion financiar. Iseni ngriti pikëpyetje të forta mbi këtë transaksion, duke sugjeruar se kredia e marrë në qershor mund të ketë shërbyer si mekanizëm për financimin e hyrjes së Macurës në tregun maqedonas. Ai kërkoi sqarime mbi diferencat e çmimeve, fitimet e mundshme dhe komisionet që mund të kenë përfituar të afërmit e Ahmetit nga ky operacion. Zëvendësministri nuk kurseu as ish-funksionarët e BDI-së, si Fatmir Besimi, Bujar Osmani dhe Artan Grubi. Ai pretendon se këta të fundit kanë ofruar mbështetje politike për hyrjen e “Alta Bankës”, ndërkohë që krushku i Ahmetit ka shërbyer si ndërmjetës për mbajtjen dhe transferimin e aksioneve drejt oligarkut serb. Duke e cilësuar këtë si një “skemë të qartë në relacionin Zajaz–Kërçovë–Beograd”, Iseni i bëri thirrje Prokurorisë Publike dhe Drejtorisë së Inteligjencës Financiare që të nisin urgjentisht një hetim. Ai theksoi se institucionet nuk kanë më asnjë arsye për të zvarritur zbardhjen e këtyre transaksioneve, të cilat sipas tij, cenojnë integritetin e sistemit bankar në vend.