Tragjedia e Pejës, Osmani shpërthen ndaj drejtësisë: Mbrojnë oborrin e gjykatës, por jo jetën e Arlindës

Deputetja e Lidhjes Demokratike të Kosovës, Vjosa Osmani, ka ngritur alarmin dhe ka shprehur indinjatën e saj të thellë pas ngjarjes tragjike që i mori jetën Arlinda Zekajt në qytetin e Pejës. Ajo ka vënë në dukje kontrastin tronditës mes efikasitetit të organeve të rendit në raste banale dhe dështimit total për të mbrojtur jetët njerëzore. Nëpërmjet një postimi në rrjetet sociale, Osmani ka drejtuar akuza të rënda ndaj institucioneve shtetërore, duke sjellë në vëmendje rastin e fundit në Graçanicë, ku pronari i një lope që kulloste në oborrin e gjykatës u arrestua menjëherë, ndërkohë që institucionet dështuan në mënyrë tragjike t'i sigurojnë mbrojtje Arlindës. "Arlindën e lanë në duart e vdekjes. Pronarin e lopës që kullot bar e arrestojnë! Kjo është logjika e tyre. Viktima pa mbrojtje. Lopa me pronar në pranga! Logjikë mesjetare. Drejtësi e përmbysur! Kur institucionet dinë të mbrojnë kullotën nga lopa, por jo jetën e njeriut, kemi prekur fundin", ka përfunduar reagimi i deputetes Osmani.