Opozita kërkon zyrtarisht shkarkimin e kryetares së Autoritetit të Konkurrencës, Neime Binaku-Isufi

Deputeti i Partisë Demokratike të Kosovës, njëherësh kryetar i Komisionit për Ekonomi, Arben Mustafa, ka nomuar se është ndërmarrë nisma zyrtare për shkarkimin e kryetares së Autoritetit të Konkurrencës, Neime Binaku-Isufi. Nëpërmjet një njoftimi publik, Mustafa ka bërë të ditur se ky hap është ndërmarrë në bashkëpunim me deputetë nga Partia Demokratike e Kosovës, Lidhja Demokratike e Kosovës dhe Aleanca për Ardhmërinë e Kosovës, me qëllim të adresimit të anomalive në këtë institucion. "Në kuadër të angazhimit për të adresuar parregullsitë në Autoritetin e Konkurrencës, si Kryetar i Komisionit për Ekonomi, bashkë me deputetë të PDK-së, LDK-së dhe Aleancës, kam iniciuar kërkesën për shkarkimin e Kryetares së Komisionit të Autoritetit të Konkurrencës, Neime Binaku-Isufi," ka theksuar ai. Sipas tij, vendimi vjen si pasojë e shkeljeve të dyshuara ligjore, shpërfilljes së vendimeve nga organet administrative dhe gjyqësore, angazhimit në aktivitete politike që bien ndesh me legjislacionin në fuqi, si dhe mungesës së transparencës dhe llogaridhënies para Komisionit parlamentar. Në anën tjetër, Mustafa ka kritikuar qasjen e deputetëve të Lëvizjes Vetëvendosje, të cilët sipas tij kanë bllokuar shqyrtimin e kësaj çështjeje duke votuar vazhdimisht largimin e saj nga rendi i ditës në Komisionin për Ekonomi, duke pamundësuar kështu debatin parlamentar mbi dyshimet për abuzime në këtë institucion. Në përmbyllje të reagimit, ai ka nënvizuar se sigurimi i zbatimit të ligjit në institucioni mbetet obligim direkt i Kuvendit dhe i të gjithë ligjvënësve që kanë për detyrë mbikëqyrjen e tyre.