Fjalimi në Strasburg, Berisha: Apeli të veprojë me objektivitet për dënimet e krerëve të UÇK-së

Kryetari i Partisë Demokratike, Sali Berisha, ka zhvilluar një adresim para Asamblesë Parlamentare të Këshillit të Europës, ku në fokus të fjalës së tij kanë qenë zhvillimet e fundit politike në Kosovë dhe vendimet e gjykatës në Hagë ndaj ish-udhëheqësve të Ushtrisë Çlirimtare të Kosovës. Gjatë fjalës së tij, Berisha bëri një përmbledhje të zgjedhjeve të përsëritura në Kosovë, duke i vlerësuar ato si procese të zhvilluara konform standardeve ndërkombëtare. Megjithatë, ai sugjeroi se duhet evituar cikli i shpeshtë i zgjedhjeve që vjen si pasojë e formulës aktuale të zgjedhjes së kreut të shtetit, ndërsa kërkoi mbështetjen e Këshillit të Europës dhe Komisionit të Venecias për të gjetur një mekanizëm më funksional për përzgjedhjen e Presidentit të Republikës. Duke ndalur te vendimet ndëshkuese të Dhomave të Specializuara në Hagë ndaj ish-komandantëve të UÇK-së, politikani shqiptar vuri në dukje se këto zhvillime kanë prodhuar valë protestash në kryeqytetin e Kosovës. Sipas tij, pakënaqësia e qytetarëve buron nga perceptimi për standarde të dyfishta dhe nga mungesa e provave bindëse për krime konkrete. Po ashtu, lideri i opozitës shqiptare ngriti shqetësime lidhur me mbarëvajtjen e proceseve gjyqësore në Hagë, duke aluduar se organet e ndjekjes penale kanë operuar me standarde të njëanshme ndaj palëve në konflikt. “Së fundmi, dënimet e dhëna nga gjykata e Kosovës në Hagë kanë ndjekur, në mënyrë befasuese, linja të qarta etnike. Në kundërshtim me statutin e saj, gjykata ka ndjekur penalisht vetëm palën e viktimës dhe jo agresorin. Prandaj, le të shpresojmë që Gjykata e Apelit t’i shqyrtojë çështjet e tyre në mënyrë më objektive”, u shpreh Berisha në fjalimin e tij. Më tej, kreu i PD-së ka trajtuar edhe çështjen e Serbisë, duke e dënuar ashpër praktikën e përcjelljes me nderime zyrtare shtetërore të ish-komandantit serb të forcave në Bosnjë, Ratko Mlladiç. “Varrimi me nderime shtetërore i kasapit të Bosnjës, orkestruesit të gjenocidit më të madh në Evropë që nga Lufta e Dytë Botërore në Srebrenicë, ishte një ekzekutim i dytë, 31 vjet më vonë, i 8500 djemve dhe burrave, vetëm për shkak të përkatësisë së tyre fetare dhe etnike”, u shpreh ai. Duke e cilësuar këtë ngjarje si një fyerje të rëndë për mbarë njerëzimin, Berisha e ka vendosur këtë qasje të Beogradit në kontekstin e kalkulimeve elektorale të udhëhequr nga presidenti serb, Aleksandar Vuçiç. “Kjo është një fyerje e rëndë për të gjithë njerëzimin, një qëndrim i Beogradit dhe i z. Aleksandar Vuçiç, i cili kërkon të fitojë zgjedhjet me fantazmën e z. Ratko Mlladiç”, përfundoi deklaratën e tij Berisha.