Kurti në Dublin: Kosova kërkon trajtim të barabartë në rrugën drejt Bashkimit Evropian

Kryeministri i Kosovës, Albin Kurti, ka zhvilluar një vizitë në Institutin për Çështje Ndërkombëtare dhe Evropiane (IIEA) në Dublin, ku ka adresuar aspiratat e Kosovës për integrim në strukturat euroatlantike. Në këtë fjalim të titulluar “Rrugëtimi i Kosovës: Nga shtetësia drejt integrimit evropian”, kreu i ekzekutivit ka bërë një pasqyrë të përparimeve demokratike dhe sfidave me të cilat është përballur shteti ynë që nga shpallja e pavarësisë. Para fillimit të adresimit, Kurti u prit në një takim zyrtar nga drejtori i përgjithshëm i IIEA-së, Mark Redmond. Në fjalën e tij, kryeministri vuri theksin te lidhjet e ngushta historike midis Kosovës dhe Irlandës, duke përmendur simbolet e përbashkëta të identitetit dhe kontributin e diasporës. Ai evokoi gjithashtu udhëtimin e Nënë Terezës drejt Dublinit në vitin 1928, si një dëshmi e lidhjeve të hershme kulturore. Duke reflektuar mbi historinë e dhimbshme të Kosovës, Kurti kujtoi periudhën e represionit, luftën çlirimtare dhe ndërhyrjen vendimtare të NATO-s në vitin 1999. Ai shprehu mirënjohje të thellë për Irlandën, një nga shtetet që mbështeti pavarësinë e Kosovës në vitin 2008, duke e cilësuar lirinë e vendit si rezultat të qëndresës popullore dhe solidaritetit ndërkombëtar. Në aspektin e brendshëm, kryeministri nënvizoi se Kosova ka shënuar progres të dukshëm në sundimin e ligjit dhe demokraci. Ai përmendi përmirësimet e renditjes në indekset e Transparency International për luftën kundër korrupsionit, vlerësimet e World Justice Project, si dhe avancimin në lirinë e medias. Përkundër krizave globale, ai theksoi se ekonomia ka pasur një rritje vjetore mbi katër për qind, shoqëruar me politika sociale si shtesat për fëmijë, rritjen e pagës minimale dhe mbështetjen për sektorin e bujqësisë. Një pjesë kritike e fjalimit iu dedikua procesit të integrimit në Bashkimin Evropian. Kurti shprehu shqetësimin se Kosova mbetet e vetmja në Ballkanin Perëndimor pa statusin e kandidatit, pavarësisht dorëzimit të aplikacionit më 15 dhjetor 2022. Ai kërkoi që procesi të zhbllokohet, duke ritheksuar se Kosova nuk kërkon favore, por trajtim të barabartë me shtetet e tjera në procesin e anëtarësimit. Në përmbyllje, kreu i qeverisë rikonfirmoi përkushtimin e Kosovës ndaj bashkëpunimit rajonal dhe zbatimit të marrëveshjeve të Procesit të Berlinit, të cilat lehtësojnë lëvizjen e lirë dhe njohjen e ndërsjellë të kualifikimeve profesionale, duke e riafirmuar vizionin e Kosovës për t'u bërë pjesë e familjes së madhe evropiane dhe NATO-s.