Kartoni i kuq që habiti Bjellorusinë: Lojtari humbet sfidën vendimtare ndaj Shqipërisë

Përfaqësuesja e Bjellorusisë ka siguruar një fitore të lehtë me rezultatin 0:2 në udhëtim ndaj San Marinos, por ndeshja ka lënë një shije të hidhur për shkak të një veprimi të papërgjegjshëm nga radhët e tyre. Mesfushori Aleksandr Svirepa është ndëshkuar me karton të kuq, duke e lënë skuadrën e tij me një lojtar më pak në minutat e fundit të takimit. Svirepa, i cili u hodh në fushë si zëvendësues në pjesën e dytë, pati një paraqitje për t'u harruar, pasi u ndëshkua dy herë brenda një harku kohor prej 20 minutash me karton të verdhë. Ky veprim i pamatur ka lënë shtangur stafin teknik dhe tifozët bjellorusë, të cilët nuk e kanë kuptuar nxitimin e futbollistit. Pas këtij zhvillimi, mesfushori do të jetë i detyruar të mungojë në ndeshjen e radhës, duke u bërë kështu një alternativë më pak për kombëtaren bjelloruse në duelin e rëndësishëm kundër Shqipërisë, i cili do të zhvillohet në Budapest. Në anën tjetër, Kombëtarja e Shqipërisë ndodhet në një pozicion shumë komod para kësaj sfide. Kuqezinjve u mjafton vetëm një barazim për të ruajtur kreun e renditjes dhe për të përmbushur përfundimisht objektivin e vendosur në grupin C1 të Ligës së Kombeve.