Pas vrasjes së Arlinda Zekajt: Qendra për Punë Sociale në Pejë thyen heshtjen pas raportit të Inspektoratit

Komuna e Pejës ka bërë publike sot qëndrimin zyrtar të Qendrës për Punë Sociale (QPS), lidhur me konstatimet e Raportit të Inspektimit të Jashtëzakonshëm, të hartuar pas vrasjes tragjike të Arlinda Zekajt, ngjarje kjo e ndodhur më 25 tetor 2026. Në reagimin e saj, QPS-ja e Pejës ka mbrojtur punën e stafit, duke argumentuar se të gjitha veprimet e ndërmarra gjatë trajtimit të rastit kanë qenë në përputhje të plotë me kompetencat ligjore. Institucioni ka sqaruar se në momentin që është kërkuar ndihma nga Stacioni Policor i Pejës, punonjësi social në kujdestari është angazhuar menjëherë, duke kryer bashkëbisedimin me fëmijën dhe vlerësimin fillestar të rrethanave familjare. Sipas njoftimit, menaxhimi i rastit ka përfshirë një varg veprimesh, siç janë vizitat në terren, analizimi i gjendjes socio-ekonomike, si dhe takimet e vazhdueshme me prindërit dhe anëtarët e familjes. Për të pasur një pasqyrë sa më të qartë të gjendjes emocionale dhe psikologjike të fëmijës, QPS-ja kishte kërkuar raporte zyrtare edhe nga “The Cambridge School” dhe Qendra e Shëndetit Mendor në Pejë. QPS-ja ka theksuar gjithashtu se ka qenë aktive në procedurat gjyqësore pranë Gjykatës Themelore në Pejë, ku ka dorëzuar dokumentacionin e nevojshëm dhe vlerësimet e organit të kujdestarisë. Pas 25 tetorit, institucioni pohon se ka koordinuar ngushtë me Prokurorinë dhe Policinë e Kosovës për të siguruar mbrojtjen e fëmijës, përfshirë caktimin e një kujdestari ligjor. Megjithatë, raporti i Inspektoratit ka nxjerrë në pah një sërë mangësish që kërkojnë ndërhyrje urgjente. Ndër gjetjet kryesore janë nevoja për përdorim strikt të formularëve standardë, respektimi i afateve ligjore për dorëzimin e raporteve në gjykatë, si dhe avancimi i mekanizmave të brendshëm të mbikëqyrjes. Po ashtu, inspektimi ka sugjeruar forcimin e kapaciteteve njerëzore dhe profesionale, si dhe nevojën për një ndarje më të qartë të kompetencave mes Qendrës për Punë Sociale dhe Drejtorisë për Mirëqenie Sociale. Në lidhje me këto vërejtje, QPS-ja ka garantuar se rekomandimet do të trajtohen me seriozitetin maksimal për t'u zbatuar në praktikë. Në mbyllje të reagimit, institucioni ka kërkuar që vlerësimi për punën e tyre të bëhet në mënyrë objektive, duke marrë parasysh kompleksitetin e veprimeve të ndërmarra dhe nevojën për përmirësime të vazhdueshme institucionale.