Tmerr në Vlorë: Fqinji 43-vjeçar sulmon me sëpatë 70-vjeçaren në banesë, e grabit dhe e përdhunon

Një ngjarje tejet e rëndë dhe tronditëse ka tronditur opinionin publik, pasi një grua e moshuar në fshatin Akërni të Vlorës dyshohet se është rrahur barbarisht, grabitur dhe abuzuar seksualisht brenda shtëpisë së saj. Sipas informacioneve zyrtare nga strukturat e rendit, krimi i rëndë ka ndodhur më datë 26 shtator. Autori i dyshuar është identifikuar si 43-vjeçari me inicialet F. Y., banor i së njëjtës zonë dhe fqinj me viktimën. Mësohet se ai është afruar në banesën e të moshuarës dhe, sapo ajo i ka hapur derën, e ka goditur papritur me sëpatë në kokë. Për shkak të goditjes së fortë, 70-vjeçarja ka humbur ndjenjat. Përfituar nga kjo situatë, autori i dyshuar ka kontrolluar dhomat e shtëpisë dhe ka arritur të vjedhë një shumë prej rreth 700 mijë lekësh të vjetra që ndodheshin brenda. Hetimet paraprake të policisë ngrenë dyshime të forta se, përveç dhunës brutale dhe vjedhjes, para se të largohej nga vendngjarja, 43-vjeçari ka kryer edhe marrëdhënie seksuale me dhunë ndaj gruas së moshuar. Menjëherë pas marrjes së kallëzimit, uniformat blu kanë nisur procedurat hetimore, duke marrë dëshminë e viktimës dhe duke sekuestruar në cilësinë e provës materiale sëpatën që dyshohet se u përdor për sulmin. Ndërkohë, shtetasi F. Y. është shpallur zyrtarisht në kërkim nga policia, ndërsa grupi hetimor po vijon veprimet intensive për zbardhjen e plotë të rrethanave. Burime pranë hetimit bëjnë me dije se i dyshuari rezulton të jetë edhe përdorues i lëndëve narkotike.