Diferenca astronomike: Vlera e yllit kuqezi kalon të gjithë kombëtaren kundërshtare

Kombëtarja e Shqipërisë do të zbresë në fushë mbrëmjen e sotme për të matur forcat me San Marinon, në kuadër të raundit të dytë të Ligës së Kombeve, ku kuqezinjtë synojnë kreun e Ligës C dhe ngjitjen në nivele më të larta. Kjo sfidë mbart një peshë specifike për ecurinë e grupit, duke qenë se objektivi parësor mbetet sigurimi i vendit të parë, një synim ky i shprehur hapur si nga stafi teknik, ashtu edhe nga vetë lojtarët. Pavarësisht se në letër ky duel duket i kalueshëm, fusha e lojës mbetet testvendimtare. Për këtë arsye, çdo formë nënvlerësimit është e përjashtuar, qasje kjo e konfirmuar edhe gjatë konferencës për shtyp nga trajneri Rolando Maran dhe kapiteni Berat Gjimshiti, të cilët kanë kërkuar përqendrim maksimal nga të gjithë. Duke iu referuar parashikimeve për formacionin startues, gazetari sportiv Gentian Alinani ka analizuar mundësitë e rreshtimit që tekniku italian do të hedhë në fushë. Mes alternativave për të nisur ndeshjen nga minuta e parë, spikat emri i Anis Mehmetit. Mesfushori i Ipswich pritet të fitojë besimin e trajnerit Maran për të shfaqur potencialin e tij të plotë përballë një kundërshtari që lejon hapësira për lojë kreative. Në fakt, Mehmeti përfaqëson një armë të fortë në skemat sulmuese të Maranit, ndërkohë që diferenca në treg është thjesht e jashtëzakonshme. Sipas platformës së specializuar “Transfermarkt”, vlera e kartonit të mesfushorit kuqezi kap shifrën e 15 milionë eurove, duke lënë pas të gjithë skuadrën kundërshtare. Për ta ilustruar këtë humnerë ekonomike, kontigjenti i plotë i kombëtares së San Marinos, e drejtuar nga trajneri Roberto Cevoli, vlerësohet në total vetëm 1.18 milionë euro, ku portieri Edoardo Colombo mban primatin si lojtari më i shtrenjtë i tyre me një vlerë prej 350 mijë eurosh.