Nga kryeqyteti te Rusia, sulmuesi i Tiranës rikthehet surprizë te ish-klubi i tij

Përfituar nga pauza e kampionatit për shkak të angazhimeve të kombëtareve, futbollisti i Tiranës, Bernard Berisha, ka ndërmarrë një udhëtim drejt Rusisë, vend ku ka kaluar një periudhë tejet të suksesshme të karrierës së tij sportive. Anësori sulmues ka zbarkuar në qytetin e Groznit, ku është pritur me ngrohtësi nga drejtuesit dhe stafi i ish-skuadrës së tij, Akhmat Grozni. Përmes një videoje të publikuar në rrjetet sociale, vetë klubi rus ka dëshmuar vizitën e lojtarit, duke vënë në pah lidhjen e fortë emocionale dhe profesionale që ekziston mes tyre nga vitet e kaluara në elitën e futbollit rus. Gjatë kësaj vizite nostalgjike në ambientet e klubit, 34-vjeçari është angazhuar në një rubrikë speciale, ku ka zgjedhur formacionin ideal me lojtarët më të mirë me të cilët ka ndarë fushën e blertë gjatë periudhës së tij te Akhmat Grozni. Gjatë aventurës së tij atje, Berisha ka lënë gjurmë të pashlyeshme, duke u shndërruar në një pikë referimi për skuadrën me plot 199 ndeshje të luajtura. Statistikat e tij flasin qartë për kontributin e dhënë, pasi ai ka arritur të tundë rrjetën 28 herë dhe të dhurojë 23 asistime për shokët e skuadrës. Kujtojmë se sulmuesi u transferua te Tirana gjatë merkatos së verës dhe është i lidhur me bardheblutë përmes një kontrate që skanon në përfundim të edicionit 2026-2027.