Debati për qendrat e të dhënave: RDM kërkon standarde të rrepta, jo tërheqje pa kritere

Lidhur me qëndrimin e shprehur nga kryeministri Hristijan Mickoski se ekzekutivi nuk do të heqë dorë nga projektet për ngritjen e qendrave të të dhënave, RDM ka theksuar se fokusi i diskutimit nuk duhet të zhvendoset te dilema nëse vendi synon apo jo përparimin teknologjik. "Kjo është arsyeja pse RDM e ka hapur temën në nivel evropian, përmes projektrezolutës mbi zhvillimin e rregulluar të qendrave të të dhënave, e cila është përzgjedhur midis katër temave për rezoluta në Kongresin e ardhshëm të Partisë së Gjelbër Evropiane në Varshavë", thuhet në njoftim. Më tej, nga kjo lëvizje shtohet se askush nuk shprehet kundër digjitalizimit apo përparimit të inteligjencës artificiale, por theksi vihet te kushtet e zhvillimit të kësaj infrastrukture dhe autoriteti që i përcakton ato. Për këtë arsye, aktualisht kërkohet vendosja e rregullave të qarta për ndërtimin e këtyre qendrave dhe infrastrukturës përcjellëse, duke siguruar pjesëmarrjen e opinionit publik dhe të gjithë faktorëve të interesuar. Sipas tyre, nuk mjaftojnë deklaratat se procesi është i pakthyeshëm apo se Qeveria nuk do të tërhiqet, pasi është jetike që kriteret e zhvillimit të ardhshëm të përcaktohen qartë që në krye të herës, përfshirë edhe përgjegjësinë e qartë në rast të shfaqjes së pasojave negative. Në reagim nënvizohet gjithashtu se procesi i zhvillimit të qendrave të të dhënave nuk duhet të shndërrohet në një garë për thithjen e investimeve ku shteti pranon kushtet e palës tjetër pa kritere, ndërsa interesi publik lihet për më vonë. Në fund, RDM vlerëson se përparimi teknologjik dhe ruajtja e pasurive natyrore nuk përjashtojnë njëri-tjetrin, por përkundrazi, një shtet bashkohor duhet të dijë të ndërtojë korniza rregullatore që nxisin investimet duke garantuar njëkohësisht sigurinë energjetike dhe ujore, ruajtjen e mjedisit dhe mirëqenien e komuniteteve lokale.