Kosova përballë Izraelit: Franco Foda ruan boshtin e skuadrës me ndryshime të detyruara

Përfaqësuesja e Kosovës në futboll është gati për sfidën e radhës në Ligën e Kombeve, ku sot në stadiumin “Fadil Vokrri” do të presë Izraelin. Përzgjedhësi Franco Foda ka planifikuar t'i qëndrojë besnik skemës taktike 3-4-3, duke bërë vetëm ndërhyrjet e domosdoshme në formacionin startues. Bazuar në përgatitjet e fundit, tekniku gjerman pritet të bëjë dy ndryshime të detyruara në krahasim me takimin e kaluar ndaj Austrisë. Në portë, Amir Saipi do të zërë vendin e Arijanet Muricit, ndërsa në qendër të mbrojtjes, Kreshnik Hajrizi do të zëvendësojë Lumbardh Dellovën, i cili është i pamundur për të luajtur për shkak të një lëndimi. Reparti defensiv pritet të përbëhet nga treshja Ilir Krasniqi, Kreshnik Hajrizi dhe Ron Raçi, të mbështetur në krahë nga Dion Gallapeni dhe Mërgim Vojvoda. Në mesfushë, dyshja Leon Avdullahu dhe Veldin Hoxha kanë përparësi për të startuar, duke lënë në stol Elvis Rexhbeçajn. Ndërkohë, në vijën e sulmit, Foda pritet t’i besojë treshit Edon Zhegrova, Vedat Muriqi dhe Baton Zabërgja, ndërsa Fisnik Asllani do të presë rastin e tij nga banka rezervë. Kjo përballje është e vlefshme për xhiron e pestë të Grupit 3 në Ligën B të Ligës së Kombeve. Dueli mes Kosovës dhe Izraelit do të nisë në orën 15:00, në një atmosferë ku “Dardanët” synojnë rezultat pozitiv para publikut vendas.