Operacion antiterror në Shkup: Arrestohen tre persona, sekuestrohen armë, snajper dhe flamur i ISIS-it

Ministria e Punëve të Brendshme ka zbardhur detajet e operacionit të gjerë policor të zhvilluar një ditë më parë, i cili u ndërmor nga Departamenti për Shtypjen e Krimit të Organizuar dhe të Krimit të Rëndë, në bashkëpunim të ngushtë me Agjencinë e Sigurisë Kombëtare, Njësinë e Specializuar për Operacione Speciale dhe SPB Shkup, nën mbikëqyrjen e prokurorit publik kompetent. Në bazë të urdhëresave të lëshuara nga gjyqtari i procedurës paraprake, autoritetet e rendit kontrolluan gjithsej 12 lokacione në rajonin e kryeqytetit, të lidhura me gjashtë persona të dyshuar. Gjatë bastisjeve u zbuluan dhe u konfiskuan një arsenal armësh, duke përfshirë pushkë automatike, një pushkë snajperi, armë zjarri të shkurta, sasi të mëdha municionesh, jelekë taktikë, pajisje për radio-komunikim, një numër të madh pajisjesh elektronike e telefonash celularë, si dhe shuma të konsiderueshme parash në denarë dhe valuta të huaja. Mes provave të siguruara figuron edhe një flamur zyrtar i organizatës terroriste ISIS. Sipas informacioneve zyrtare të publikuara nga institucioni i sigurisë, i dyshuari kryesor K.I. (34 vjeç) dyshohet se ka qenë pjesë aktive e një strukture kriminale me prapavijë ideologjike të ISIS-it që nga viti 2023. Hetimet kanë dëshmuar se i njëjti person është marrë me indoktrinimin e personave të rinj në moshë, ka shpërndarë materiale propagandistike me përmbajtje ekstreme e radikale, si dhe ka siguruar dhe menaxhuar armatim luftarak. Në kuadër të të njëjtit aksion të ndërmarrë nga policia dhe shërbimet e inteligjencës në Shkup, u ndaluan edhe personat e tjerë të dyshuar për veprimtari të paligjshme. Sipas raportit hetimor, B.A. (24) dhe E.S. (30), në bashkëpunim me K.I., kishin ngritur një grup përmes të cilit mbanin, ndërmjetësonin dhe tregtonin në mënyrë të kundërligjshme armë zjarri e municione. Më 29 shtator, Sektori i specializuar për Luftimin e Terrorizmit, Ekstremizmit të Dhunshëm dhe Radikalizmit ka dorëzuar kallëzim penal ndaj tre të dyshuarve pranë Prokurorisë Themelore Publike për Ndjekjen Penale të Krimit të Organizuar dhe Korrupsionit. Ndaj 34-vjeçarit K.I. rëndojnë akuzat zyrtare për veprat penale të "terrorizmit" dhe "prodhimit, posedimit, ndërmjetësimit dhe tregtimit të paautorizuar të armëve ose eksplozivëve", ndërsa B.A. dhe E.S. po ndiqen penalisht për veprën që ka të bëjë me armëmbajtjen dhe tregtimin e paligjshëm të armëve apo lëndëve plasëse. Gjatë kontrolleve në terren, autoritetet kanë konstatuar gjithashtu keqpërdorim dhe shfrytëzim të paautorizuar të energjisë elektrike, për çka nga Ministria e Brendshme bëhet e ditur se janë ndërmarrë masa dhe veprime shtesë ligjore.