Debutimi i madh në Beograd: Brajan Gruda titullar me Gjermaninë kundër Serbisë

Gjermania ka nisur me vrull sfidën e xhiros së pestë të Grupit 2 në Ligën A të Ligës së Kombeve, duke diktuar ritmin në përballjen ndaj Serbisë në Beograd. Pas 12 minutash lojë, “Pancerat” po demonstrojnë dominim total në fushë, duke mbajtur iniciativën dhe duke ushtruar presion të vazhdueshëm mbi portën vendase. Ndeshja po zhvillohet në kushte atmosferike të vështira, me një reshje të dendur shiu, ndërsa stadiumi “Rajko Mitiç” mbetet i zbrazët. Ky vendim është marrë si pasojë e dënimit të autoriteteve të futbollit ndaj Serbisë, për shkak të sjelljeve raciste dhe diskriminuese të tifozërisë së saj në ndeshjet e kaluara. Momenti kulmor i ndeshjes erdhi shumë shpejt, në minutën e 3-të. Pas një harkimi nga goditja e këndit nga Mittelstadt, Kai Havertz goditi me kokë, topi devijoi në barkun e Babiqit dhe përfundoi në rrjetë për t'i dhënë avantazhin Gjermanisë. Kjo e fundit, si favorite e këtij takimi, synon të largohet nga kryeqyteti serb me pikët e plota. Sytë e opinionit sportiv shqiptar janë të përqendruar te Brajan Gruda. Futbollisti me origjinë shqiptare ka marrë besimin e stafit teknik për ta nisur ndeshjen si titullar, duke shënuar kështu debutimin e tij zyrtar me kombëtaren A të Gjermanisë. Gruda, i cili po kalon një formë të shkëlqyer me RB Leipzigun në Bundesliga (me 2 gola dhe 5 asistime këtë sezon), i është bashkuar gjermanëve pas një periudhe të suksesshme me ekipin U21. Edhe pse Federata Shqiptare e Futbollit kishte shfaqur interes për ta afruar lojtarin, Gruda ka zgjedhur të përfaqësojë Gjermaninë, vendin ku po zhvillon karrierën e tij profesionale. Kujtojmë se ai është në pronësi të Brightonit, me kontratë deri në vitin 2027. Formacionet zyrtare: Serbia: V. Milinkoviq-Saviq, Gudelj, Milenkoviq, Babiq, Nedelkoviq, S. Milinkoviq-Saviq, Xhodiq, Sukaçev, Samarxhiq, Tadiç, Cvetkoviq. Gjermania: Ter Stegen, Treu, Thiaw, Tah, Mittelstadt, Kimmich, Pavlloviq, Wirtz, Gruda, Havertz, Scherhant.