Besa e fiton ndeshjen e fortë me Prishtinën

Prishtina e Besa e kanë luajtur të premten mbrëma ndeshjen e fundit të xhiros së shtatë të Superligës së Kosovës në hendboll në konkurrencë të femrave. Pas një ndeshjeje të fortë, fitorja me rezultat 29:27 i takoi skuadrës pejane, Besa. E gjithë ndeshja ishte e barabartë. Në pjesën e parë Prishtina u shkëput në 16:13, me të cilin rezultat skuadrat shkuan në pushim. Pas minutës së 46-të, Besa doli në epërsi 21:20 dhe 22:20. Më pas pejanet u shkëputën edhe në tri gola dhe Prishtina nuk ia doli të kthehet më. Edona Radoniqi i shënoi tetë gola për Besën, kurse shtatë i kishte Dorentina Qufaj. Learta Gashi kontribuoi me gjashtë gola në fitore. Te Prishtina nëntë gola i shënoi Elda Hergaja e pesë të tjera Bulëza Maksuti. Besa tani është e katërta në tabelë me gjashtë pikë. Prishtina mbetet e gjashta me dy pikë.