Aktivitet i paligjshëm narkotikësh në Deçan: Prokuroria kërkon paraburgim dhe arrest shtëpiak për dy të dyshuar

Prokuroria Themelore në Pejë, respektivisht Departamenti i Krimeve të Rënda, ka ndërmarrë hapa ligjorë duke kërkuar caktimin e masës së paraburgimit për të pandehurin S.O., ndërsa për të pandehurin tjetër, E.O., ka paraqitur kërkesën për vendosjen e masës së arrestit shtëpiak. Dy personat në fjalë po ballafaqohen me hetime lidhur me veprën penale të “Kultivimit të bimës së hashashit, shkurres së kokainës ose bimëve të kanabisit”, pasi ekziston dyshimi i bazuar se të njëjtët kanë vepruar në bashkëkryerje për këtë rast. Sipas dosjes së prokurorisë, gjatë këtij viti, saktësisht në fshatin Isniq të Komunës së Deçanit, të dyshuarit dyshohet se janë angazhuar në kultivimin e bimëve të llojit Kanabis Sativa, me synim që përmes tyre të prodhonin substanca narkotike ose psikotrope. Në fund, Prokuroria Themelore në Pejë ka theksuar se do të vijojë me përkushtim angazhimin e saj institucional në drejtim të luftimit dhe parandalimit të të gjitha veprave penale që cenojnë sigurinë publike, me theks të veçantë ato që ndërlidhen me narkotikët.