Kosova dhe Turqia forcojnë partneritetin për menaxhimin e qëndrueshëm të burimeve ujore

Ministrja e Mjedisit, Planifikimit Hapësinor dhe Infrastrukturës, Fitore Pacolli, ka zhvilluar një takim zyrtar me ministrin e Bujqësisë dhe Pylltarisë të Turqisë, İbrahim Yumaklı. Fokus i këtij takimi ishte shkëmbimi i përvojave dhe mundësitë për bashkëpunim të ngushtë ndërmjet dy vendeve në sektorin e menaxhimit të ujërave. Gjatë këtij bashkëbisedimi, palët trajtuan çështje kyçe si ndërtimi i digave, strategjitë për mbrojtjen e lumenjve, si dhe implementimin e praktikave për menaxhimin efikas dhe afatgjatë të burimeve ujore. Ministrja Pacolli vlerësoi lart ekspertizën e Turqisë në këtë fushë, duke e cilësuar atë si një mbështetje të vyer për projektet infrastrukturore që Kosova synon t’i jetësojë në të ardhmen. Sipas kreut të dikasterit të Mjedisit, prioriteti kryesor i këtij angazhimi është garantimi i sigurisë ujore për vendin, përmes krijimit të një sistemi më të qëndrueshëm dhe bashkëkohor të menaxhimit të burimeve hidrike.