Veriu i Shqipërisë nën pushtetin e motit të keq: Kukësi, Hasi dhe Tropoja mbeten pa energji

Reshjet intensive të shiut, të shoqëruara nga erëra të fuqishme, kanë sjellë përkeqësim të ndjeshëm të kushteve atmosferike në zonat veriore të vendit. Si pasojë e kësaj situate, një pjesë e konsiderueshme e Qarkut të Kukësit po përballet me ndërprerje të furnizimit me energji elektrike, duke prekur veçanërisht njësi administrative dhe lagje të ndryshme në Kukës, Has dhe Tropojë. Përveç problemeve me rrjetin elektrik, moti i paqëndrueshëm ka shkaktuar rrëshqitje të inerteve dhe gurëve në disa akse rrugore nacionale. Në Bashkinë e Tropojës është raportuar rënie gurësh në rrugën Margegaj–Valbonë, ndërsa situata është bërë problematike edhe në zonën e Shkodrës. Në Theth, dalja e përroit nga shtrati ka sjellë bllokimin e qarkullimit në aksin Theth–Ndërlysaj. Aktualisht, autoritetet vendore kanë nisur operacionet për pastrimin e rrugëve dhe normalizimin e lëvizjes së automjeteve, ndërkohë që raportohet se nuk ka rrezik për banesat e zonës. Grupet e punës janë në terren për të monitoruar situatën dhe për të rikthyer energjinë elektrike në zonat e prekura. Sipas parashikimeve meteorologjike, moti i paqëndrueshëm do të vijojë përgjatë gjithë fundjavës në të gjithë territorin shqiptar, me theks të veçantë në Veri, ku priten shtrëngata të herëpashershme. Temperaturat do të luhaten në vlerat nga 8 deri në 23 gradë Celsius.