Shqipëria shkëlqen ndaj Finlandës, Duka thirrje lojtarëve: Na duhet edhe një hap për kreun e grupit

Kombëtarja shqiptare e futbollit ka regjistruar një fitore bindëse me rezultatin 2-0 përballë Finlandës, në sfidën e zhvilluar në stadiumin “Air Albania”, e vlefshme për Ligën C të Ligës së Kombeve. Ky sukses i rëndësishëm nuk ka kaluar pa u vënë re nga presidenti i Federatës Shqiptare të Futbollit, Armand Duka. Kreu i institucionit më të lartë të futbollit në vend ka vlerësuar maksimalisht paraqitjen e djemve të drejtuar nga trajneri Rolando Maran, ndërsa ka theksuar nevojën për një angazhim maksimal edhe në përballjen e së dielës kundër Bjellorusisë, e cila do të përcaktojë edhe fituesin e grupit. Në një mesazh entuziast pas ndeshjes, Duka u shpreh: “Kjo mbrëmje nuk mund të ishte më e bukur se kaq! As fitorja nuk mund të kishte shije më të veçantë sesa sonte, në një stadium të mbushur me gati 22 mijë tifozë shqiptarë.” Duke mbyllur deklaratën e tij, kreu i FSHF-së uroi ekipin dhe stafin teknik për punën e bërë, duke shtuar: “Urime çuna, urime stafit për këtë sukses! Edhe një sforco të dielën kundër Bjellorusisë, për ta mbyllur këtë rrugëtim ashtu siç duhet dhe për të festuar së bashku!”