Manastir: 69-vjeçari akuzohet për evazion fiskal, dëmi ndaj buxhetit kalon 500 mijë denarë

Sektori për Punë të Brendshme në Manastir ka ndërmarrë masa ligjore ndaj një 69-vjeçari dhe subjektit të tij juridik, pas dyshimeve për shmangie të detyrimeve tatimore. Ndaj të dyshuarit, i identifikuar si J.J., është ngritur kallëzim penal për veprën penale “fshehje tatimore”. Sipas hetimeve të autoriteteve, i dyshuari, në cilësinë e drejtuesit të kompanisë, ka tentuar t'i shmanget pagesës së tatimit mbi fitimin për vitin 2024. Ai ka regjistruar shpenzime në evidencën kontabël pa ofruar dokumentacionin mbështetës të nevojshëm apo specifikime të qarta, duke e bërë të pamundur vërtetimin e natyrës dhe periudhës së këtyre shpenzimeve. Pas një kontrolli të detajuar të kryer nga Drejtoria e të Ardhurave Publike (DAP), është konstatuar se veprimet e paligjshme kanë sjellë një dëm të konsiderueshëm financiar për arkën e shtetit. Si rrjedhojë, ndaj subjektit juridik është lëshuar vendimi për shlyerjen e detyrimeve të prapambetura, përfshirë kamatat, në vlerë totale prej 501.765 denarësh.