Gjykata Speciale përcakton panelin e Apelit për çështjen e ish-krerëve të UÇK-së

Dhomat e Specializuara të Kosovës kanë zyrtarizuar përbërjen e trupit gjykues të shkallës së dytë, i cili do të shqyrtojë zhvillimet e mëtejshme lidhur me aktgjykimin ndaj ish-udhëheqësve të Ushtrisë Çlirimtare të Kosovës. Sipas vendimit të marrë më 22 shtator nga kryetarja e këtij institucioni, Ekaterina Trendafilova, paneli i Apelit do të përbëhet nga gjyqtarët Michèle Picard, Kai Ambos dhe Nina Jørgensen. Në njoftimin zyrtar të Dhomave të Specializuara bëhet e ditur se ky trup gjykues do të ketë për detyrë të shqyrtojë kërkesat e avokatëve mbrojtës për shtyrjen e afateve lidhur me dorëzimin e njoftimit për ankesë, si dhe çdo parashtresë tjetër nga palët e përfshira në proces. “Presidentja e Dhomave të Specializuara, gjyqtarja Ekaterina Trendafilova, caktoi një Trup Gjykues të Apelit për të vendosur lidhur me kërkesën e ekipeve të mbrojtjes për zgjatjen e afatit për paraqitjen e njoftimit për apel, si dhe për të gjitha parashtresat e cilësdo palë që lidhen me një njoftim për apel kundër Aktgjykimit të Gjykimit në këtë çështje”, thuhet në njoftim. Vendimi për përzgjedhjen e këtyre gjyqtarëve është marrë duke u bazuar në kriteret e përcaktuara në Rregullën 4 të Rregullores për Caktimin e Gjyqtarëve, ku përfshihen ekspertiza profesionale, përvoja e gjatë në fushën juridike dhe disponueshmëria e tyre. Kjo lëvizje institucionale pason vendimin e shkallës së parë ndaj ish-krerëve të UÇK-së, duke shënuar kështu nisjen formale të procedurave në kuadër të fazës së shqyrtimit ankimor.