Grabitja milionëshe në Prishtinë: Si u pastruan paratë e vjedhura nga argjendaria për blerjen e një banese

Prokuroria Themelore në Prishtinë ka zyrtarizuar ngritjen e aktakuzës ndaj të pandehurve X.V. dhe B.B., të cilët dyshohen për një sërë veprash të rënda penale, përfshirë vjedhjen e argjendarisë, mbajtjen e paligjshme të armëve dhe shpërlarjen e parave. Sipas dosjes së prokurorisë, ngjarja ka ndodhur gjatë natës së 18 dhe 19 janarit të vitit 2026, kur i dyshuari X.V., në bashkëpunim me persona ende të paidentifikuar, ka depërtuar në një argjendari në rrugën “Agim Ramadani” në kryeqytet. Përmes përdorimit të mjeteve elektrike, ata kanë hapur murin dhe kasafortën e objektit, duke arritur të grabisin rreth gjashtë kilogramë ar, stoli të ndryshme dhe një armë zjarri, me një dëm total që kap vlerën e 1.236.000 eurove. Në një kontroll të mëvonshëm të zhvilluar më 30 mars 2026, autoritetet policore gjetën në banesën e X.V. një pistoletë të llojit “Ekol Tuna”, bashkë me karikator dhe fishekë, të cilat mbaheshin pa lejen përkatëse të organeve të sigurisë. Hetimet kanë zbuluar se dyshja X.V. dhe B.B., në periudhën janar-shkurt 2026, kanë ndërmarrë veprime të sofistikuara për të fshehur prejardhjen e parave të vjedhura. E pandehura B.B. dyshohet se ka depozituar në gjashtë raste të ndara shumën prej 44.300 eurosh në llogarinë e saj bankare, duke u munduar t’i paraqesë ato si kursime familjare apo të ardhura nga aktivitete të ligjshme biznesore, me qëllim krijimin e një rrjedhe të rreme financiare. Kulmi i kësaj skeme ka qenë blerja e një banese në Prishtinë, vlera e së cilës arrin në 85.000 euro. Sipas aktakuzës, B.B. e ka bërë pagesën në para të gatshme për pronën në fjalë, në prani të X.V., duke u regjistruar si blerëse e saj me qëllim shpëlarjen e mjeteve të përfituara nga krimi. Prokurori i çështjes i ka propozuar gjykatës konfiskimin e përhershëm të banesës së blerë në mënyrë të kundërligjshme, si dhe të një veture që ndodhet aktualisht nën masën e urdhrit ndalues. Në përfundim, organi i akuzës ka kërkuar nga gjykata që, pas shqyrtimit të provave, të pandehurit të shpallen fajtorë dhe të marrin dënimin meritor sipas legjislacionit në fuqi.