Bashkëpunimi për klimën dhe mjedisin, Pacolli takohet me emisarin holandez në Antalia

Ministrja e Mjedisit, Fitore Pacolli, ka zhvilluar një takim dypalësh me të Dërguarin e Mbretërisë së Holandës për Klimën, Jan Versteeg, në kuadër të punimeve të samitit COP31 që po zhvillohet në qytetin e Antalias. Sipas njoftimit zyrtar të ministres, në qendër të këtij takimi ishin mundësitë konkrete të bashkëpunimit dypalësh, me fokus të veçantë te menaxhimi i burimeve ujore, ekonomia qarkore, tranzicioni i gjelbër energjetik, si dhe planifikimi hapësinor. Gjatë bisedës, Pacolli ka njohur homologun e saj holandez me reformat kyçe që po ndërmerr vendi ynë në sektorin e mbrojtjes mjedisore. Ajo ka veçuar nismat për mbrojtjen dhe restaurimin e lumenjve, miratimin e Ligjit të ri për Mbeturina, si dhe hapat e ndërmarrë drejt zhvillimit të energjisë së ripërtëritshme. Në përfundim të takimit, ministrja bëri të ditur se ka shprehur gatishmërinë dhe interesimin e Kosovës për të përthithur ekspertizën dhe praktikat e avancuara holandeze, sidomos në aspektin e menaxhimit të ujërave dhe zbatojmë e zgjidhjeve të mbështetura te natyra.