Kryeziu sqaron rrugën ligjore për Dhomat e Specializuara: Si duhet të veprojë Kuvendi pas kthimit të ligjit?

Ish-gjyqtari i Gjykatës Kushtetuese, Kadri Kryeziu, ka dhënë detaje rreth hapave që duhet të ndërmarrë Kuvendi i Kosovës lidhur me Ligjin për Dhomat e Specializuara, pasi ky i fundit u kthye për rishqyrtim nga presidentja Justina Shiroka-Pula. Sipas tij, amendamentimi i ligjit në formën e tij aktuale nuk është i mundur, pasi kthimi i tij nga kreu i shtetit e ka vendosur atë në gjendje të suspenduar. Në një paraqitje për emisionin “Five” në TV Dukagjini, Kryeziu sqaroi se ekzistojnë vetëm dy rrugë ligjore për të dalë nga kjo situatë. E para është nisja e një procesi tërësisht të ri legjislativ, duke filluar nga zero me të gjitha procedurat parlamentare. Mundësia e dytë, sipas tij, është që Kuvendi ta votojë ligjin sërish me një shumicë prej së paku 61 votash, gjë që do t'i mundësonte hyrjen në fuqi pa pasur nevojë për dekretimin e presidentes. Duke iu referuar nenit 80 të Kushtetutës, Kryeziu theksoi se presidenti ka të drejtë ta kthejë një ligj në Kuvend vetëm një herë. “Nëse parlamenti nuk dëshiron të hartojë një ligj të ri, atëherë brenda katër javësh, në përputhje me Rregulloren e Kuvendit, duhet të sigurojë 61 vota. Në këtë rast, ligji hyn në fuqi drejtpërdrejt, pa nevojën e nënshkrimit nga presidenti”, shpjegoi ai, duke e cilësuar këtë situatë si të paprecedentë dhe të paqartë nga ana procedurale. Ish-gjyqtari i Kushtetueses vuri në dukje se ndryshimet në përmbajtjen e ligjit nuk mund të bëhen përmes amendamenteve të thjeshta, për shkak të statusit të tij aktual. Ai ritheksoi se çdo përpjekje për ndryshime thelbësore kërkon një proces të ri, që përfshin komisionet profesionale dhe të gjitha shqyrtimet e parapara me ligj. Në lidhje me kompetencat e presidentes, Kryeziu nënvizoi se ajo duhet të veprojë në mënyrë të pavarur dhe jo nën ndikimin e partive politike. Sipas tij, kthimi i një ligji është kompetencë ekskluzive dhe duhet të bazohet vetëm në dy kritere kushtetuese: nëse ligji cenon rendin juridik dhe kushtetues, ose nëse cenohen të drejtat dhe liritë e pakicave kombëtare. Kujtojmë se ndryshimet në Ligjin për Dhomat e Specializuara ishin miratuar fillimisht nga Kuvendi më 6 tetor, ngjarje kjo që ka nxitur debate të shumta politike dhe juridike mbi procedurat që pasojnë.