Tragjedi në Zvicër: 16-vjeçari humb jetën në vendin e punës, miku i tij rrëfen ëndrrat e thyera

Një ngjarje e rëndë ka tronditur opinionin publik në Zvicër, pasi një 16-vjeçar ka humbur jetën gjatë orarit të punës në Leibstadt të kantonit Aargau. Aksidenti fatal ndodhi të mërkurën në mëngjes në ambientet e kompanisë së përpunimit të drurit, 'Kuratle Jaecker'. Sipas informacioneve paraprake, i riu ka ndërruar jetë pasi është goditur nga një karrocë ngritëse. Pavarësisht ndërhyrjes së shpejtë të ekipeve të emergjencës, dëmtimet ishin fatale dhe 16-vjeçari ndërroi jetë në vendngjarje. Policia e kantonit Aargau ka nisur një hetim të detajuar për të zbardhur rrethanat e sakta të kësaj tragjedie. Lajmi për vdekjen e parakohshme ka lënë të shokuar miqtë dhe të afërmit e tij. Rrust Golaj, një 17-vjeçar shqiptar dhe shoku më i ngushtë i viktimës, e ka përshkruar mikun e tij si një person me karakter të veçantë dhe pozitiv. “Nuk mund ta besoja që ai nuk është më mes nesh. Ai kurrë nuk shfaqte negativitet; ishte plot ëndrra dhe punonte fort për të kursyer para për prindërit e tij”, është shprehur Golaj, i prekur thellë nga humbja e shokut. Në shenjë respekti dhe për t’u dhënë mundësi autoriteteve të kryejnë hetimet, kompania 'Kuratle Jaecker' ka ndërprerë aktivitetin gjatë ditës së mërkurë. Drejtori i këtij biznesi familjar, 37-vjeçari Roger Kuratle, ka konfirmuar ngjarjen tragjike, duke shprehur ngushëllimet më të thella për familjen e të ndjerit. Kuratle, i cili është vetë baba, e ka përshkruar këtë ndodhi si një ndër momentet më të vështira që mund të përjetohen. Aktualisht, organet kompetente, përfshirë prokurorinë dhe policinë, po vazhdojnë punën për të sqaruar dinamikën e aksidentit, ndërkohë që identiteti i viktimës mbetet i konfidencial për arsye të hetimit dhe privatësisë së familjes.