Rrëfimi rrëqethës i Kulusevskit: Si iu shmang operacionit drastik që mund t'i jepte fund karrierës

Pas një mungese të gjatë prej 526 ditësh, e shkaktuar nga një dëmtim i rëndë në kërcin e gjurit, Dejan Kulusevski është rikthyer të jetë pjesë e kombëtares së Suedisë. Sulmuesi anësor i Tottenhamit, i cili u rikthye në fushë tetorin e kaluar, është përfshirë në listën e trajnerit Graham Potter për sfidat vendimtare të Ligës së Kombeve kundër Bosnjë-Hercegovinës dhe Polonisë. Megjithatë, rruga drejt rikuperimit ka qenë tejet sfiduese. Në një rrëfim të hapur, futbollisti zbuloi se pas dy operacioneve të dështuara, mjekët i kishin sugjeruar një transplant gjuri, një ndërhyrje që do ta mbante atë larg futbollit për të paktën 18 muaj të tjerë. Në këto momente dëshpërimi, këshillat nga Zlatan Ibrahimovic dhe Ivan Perisic e drejtuan atë te një specialist në Serbi. “Opsioni ishte transplantimi i gjurit. Do të zëvendësoja gjurin tim me një të huaj, por unë refuzova kategorikisht. Vendosa që, edhe nëse do të ndieja dhimbje gjatë lojës, do të preferoja të luaja ashtu,” rrëfeu Kulusevski. Ai pranoi se në ato çaste të errëta kishte menduar seriozisht të tërhiqej nga futbolli për t'u shpërngulur në një ishull me familjen, duke shtuar se prania e vajzës së tij ka qenë motivi kryesor që e mbajti të fortë. Në fund, ndërhyrja e mjekut serb rezultoi vendimtare për karrierën e tij. “Doktori ishte jashtëzakonisht i rëndësishëm për mua. Më tha të mos mendoja për operacione të tjera dhe më tregoi një rrugë tjetër për të vazhduar,” përfundoi suedezi.