Gjetje rrëqethëse në Shtërpcë: Zbulohen mbetje mortore gjatë gërmimeve për personat e zhdukur

Operacioni i kërkimit për personat e zhdukur gjatë luftës ka rezultuar me zbulimin e mbetjeve mortore në fshatin Brod të Komunës së Shtërpcës. Lajmi është konfirmuar nga Komisioni Qeveritar për Persona të Zhdukur, pas përfundimit të aktiviteteve në terren të enjten. Procesi i kërkimit në këtë zonë kishte filluar më 6 nëntor 2026, bazuar në një urdhër gjyqësor. Megjithatë, përpjekjet fillestare nuk patën sukses, pasi ndryshimet e mëdha topografike të terrenit gjatë viteve e kishin bërë të vështirë lokalizimin e saktë të varrit të dyshuar. Pas vazhdimit të gërmimeve më 12 nëntor, ekipet e specializuara arritën të gjejnë mbetjet mortore. Tashmë, këto mbetje i janë nënshtruar procedurave mjekoligjore dhe pritet t'i nënshtrohen analizave të ADN-së për të bërë identifikimin e plotë të identitetit të personit. Ky operacion u realizua falë një bashkëpunimi ndërinstitucional mes Komisionit Qeveritar, Institutit për Mjekësi Ligjore, Policisë së Kosovës – përkatësisht Sektorit për Hetimin e Personave të Zhdukur – dhe Departamentit për Krime të Luftës pranë Prokurorisë. Sipas autoriteteve, lokalizimi i këtij vendi të dyshuar është arritur falë një procesi të detajuar, i cili përfshiu edhe bashkëpunimin rajonal me institucionet kroate, si dhe komunikimin e vazhdueshëm me familjarët e personave që ende figurojnë si të zhdukur.